Aizawl : Mizoram hmun hrang hranga leng mek African Swine Fever (ASF) chungchangah Vety department chuan Aizawl bikah chuan vawk thi te chu Local Level task Force (LLTF) kuta awm a nih thu ZALEN an hrilh.

ASF avang hian vawk thi tamna veng leh hri an hmuhna veng engemaw zat chu Vety Department lam hian containment zone-ah an puang a, heng veng atang hian vawk lakchhuah khap a nih piah lamah lakluh pawh khap a ni a, vawk pawh talh phal a ni lo. Hetihlai hian heng containment zone-ah hian vawk talh an awm thin niin ZALEN chuan thu a dawng a, mahse, Vety lam chuan an hriatpui loh thu an sawi thung.

Dr. Lalhmingthanga, Joint Director, AH&Vety Department chuan, "Containment zone-a kan puan bak chu en chhunzawm hna hi kan thawk zui lem lo. Enforcement kalpui tur mihring kan nei chuang lo a ni," tiin ZALEN a hrilh a. LLTF te nen inbiakna neiin an kutah engkim an dah thin thu a sawi.

ASF avanga vawk thi te hi a tirah chuan AH& Vety lam chuan Industrial Growth Centre leh Hualngohmun rama phum turin ruahmanna an siam a, mahse, heng hmun awmna lam veng leh khua te chuan an remtih loh avangin heng hmunah te hian phum an ni ta lo a, vawk thi an awm chuan a veng LLTF ten a phumna tur hi an lo ngaihtuah sak mai thin niin thudawnna hian a sawi bawk.
    Containment area chhung veng thenkhata vawk talh an awm leh awm loh pawh an hriat lem loh thu a sawi rualin, vawk talh report hi an dawn ngai loh thu a sawi bawk a ni.

ZALEN in a biak veng pakhat LLTF hruaitu chuan vawk vulh thenkhat ten vawk an talh thin tih a pha lem lo a, chutihrualin vawk hrisel tha pangngai, thenawm te pawhin an lei hreh lem loh talh an awm thin tih an zep hran lo. "Vawk hri kai lo, talh lo phal loh sak ngawt hi a fuh lohna chen a awm thei. Hri kai palh ta se a neitute tan sum tam tak chan theihna a ni a, chu ai chuan an lo talh mai kha a thatna chen a awm. Tun ang hunah inpuih sen a ni lo a, in puihna pawh a nihna pah fawm a, talh kan phalsak ni lovin a ruka an lo talh a nih chuan action lak tul kan ti lem lo," tiin a sawi.