Mizoramah ran natna chi hrang hrang a thleng thin a, kum 2/3 kalta mai khan vawk natna chi khat Porcine reproductive and respiratory syndrome (PRRS) avangin vawk engemaw zat a thi a. He natna hian min kiansan tawh nia a lan hnuah tunhnaiah vawk natna hlauhawm ber mai African Swine Fever (ASF) ni ngeia hriat chuan Mizoram a lo thleng a, vawk engemaw zat an thi tawh.

African Swine Fever natna tuar nasa ber chu Lungsen nia hriat a ni a, Zirtawpni ringawt pawh khan he hri ni ngeia hriat vang hian vawk 44 an thi a, hriattheih chinah Lungsen ah hian vawk 320 a thi tawh a, damlo mek pawh engemaw zat an la awm a ni. Lungsen mai bakah hian a chheh-vel khua ah vawk engemaw zat a thi tawh bawk a, mithiamte chuan African Swine Fever hi Bangladesh atanga lut niin an ngai.    

AH&Vety department thawktu te chuan tunhnaia Mizoram hmun hrang hranga vawk thih chhan chu African Swine Fever ni ngeiin an hria a, mahse he natna hi a ni ngei em tih chu National Institute of High Security Animal Diseases, Bhopal chauhin an puang thei tih Zalen an hrilh a. Mizorama vawk thi te chu a sample lain National Institute of High Security Animal Diseases, Bhopal a endik tur hian Ningani khan an thlenpui tawh a, hun reilote ah vawk thih chhan hi an puan theih an beisei tih an sawi.

AH&Vety thawktu te chuan ASF hri len chhan chu state pawn atanga vawk, vawksa rep leh vawk puahsa lakluh vang niin an sawi a. "lockdown laia ramri kan ven uluk lai kha chuan state thenawmah he natna hi hmuh ni mah se, kan fihlim a, mahse tunhnaiah ramri ven anih tak loh avangin dan phal loha ran lalut an awm a, hei vang hian African Swine Fever hi kan state ah a leng ta ni berin a lang," an ti.

African Swine Fever ni ngeia hriat vang hian Lungsen leh a chhevel mai bakah Zawlnuam, Armed veng leh Edenthar ah te vawk engemaw zat an thi tawh a, heng hmun te hi hri lenna 'infested area' ah puan a ni. African Swine Fever hi mihring tan chuan hlauhawm lo mah se, natna pudarhtu an ni thei a ni.

African Swine Fever hi kum 1921 khan Kenya ah hmuh tan a ni a, India ramah chuan a tum khatna atan January 2020 khan Assam leh Arunachal Pradesh ah te hmuh a ni. He natna vei vawk te chu an thi zel nia thudawn a ni.