Aizawl March 10, 2024 : Aizawl Municipal Council (AMC) huam chhung-ah vawk vulh ngaihnathiamna (exemption) dil an thahnem hle a, mi 8,017 an awm. Hetihlai hian phalna neilo te lakah dan awmsa khauh tak a kenkawh a ni dawn.

AMC hotute hnen atanga ZALEN thudawn danin, ngaihnathiamna dil mi 8,017 te chu tun thlenga AMC office lam a dilna lut niin, local council lam a dilna thehlut pawh mi engemawzah an awm.

AMC hotute chuan ngaihnathiamna dil te chu a hmunah endik mek a ni tih an sawi a, veng thenkhat-ah chuan endik hna an zo tawh.

Notication chhuah hnu a vawk note lo la leh ang chi te leh phalna nei lo a vawk vulh an hmuhchhuah te dan angin hrem zel an ni dawn tih AMC hotute chuan ZALEN an hrilh.

Vawk vulh ngaihhnathiamna hi January 2024 chhung dil theih a ni a, diltute chu vawk an vulh lai leh vulhna hmunte February 2024 chhunga AMC leh LC aiawhte'n an endik hnuah phalna pek tlaka an ngaihte hnenah permit pek a ni dawn.

Vawk vulh laklawhte chu vawk len dan azirin tihral/talh hun tur chhut a ni ang a, chumi hmang chuan permit pek a, permit dam hun chhung chhut tur a ni. Permit dam chhung bak chu khuahkhirhna huam chhungah vawk vulh phal a ni dawn lo.

AMC huam chhungah mi dang tana hlauhawm leh hnawksak zawnga vawk vulhte chu Municipality Act Section 175 angin Rs. 2,000 thleng chawitir theih a ni a, an zawm loh zel chuan ni tin Rs. 200 chawi belhtir zel theih a ni.

Section 178 hmangin ran in nei mumal lote chu Rs. 2,000 thleng pawisa chawitir theih a ni a, an siamthat loh chuan ni tin Rs. 200 chawi belhtir theih a ni. AMC Solid Waste Management By-Law, 2019 hmangin vantlang hmuna thenfai loha ran ek a awm chuan Rs. 5,000 thleng chawitir theih a ni bawk.