Mizote sa duh ber chu Vawksa a ni ti ila kan sawi sual awm love. Ruaitheh leh chaw eikhawm nikhua ah pawh a tel lo chuan a kim lo thin a, Mizopa ka ah chuan a tui ber a ni ti ila a dik viau awm e. Pathianni tuk chawhmeh ah pawh vawksa ngat hmeh tum hi chhungkaw tam ber kan ni hial awm e.

Heti khawpa tui kan tih vawksa ah erawh Mizoram hi kan intodelh lo hle a, vawk natna chimawm tak African Swine Fever vanga state pawn atanga vawk lakluh khap anih hnu phei chuan a vang lehzual a. Vawk talh tur a tlem bakah vawksa awmchhun chu kan inchuh zo duak duak a, sa sat pawh kan intlawn siak deuh thaw hial a ni.

Tunhnaiah vawk natna chimawm tak mai African Swine Fever chuan Mizoram rawn thlengin Lungsen khuaah vawk thahnem tak a thi a, African Swine Fever hian Aizawl leh khaw dang dang pawh a run chho ta zel mai. AH & Vety department chhinchhiah danin vawk thi hi 1200 chuang an tling tawh hial a ni. Vawk hi a la thi chho zel dawn ni pawhin a lang.

Vawk engemaw zat an thih avang hian vawk vulhtu te pawh an vawk chu hri in a man ang a, a thi mai ang tih hlauvin tunlai hian an vawk tihralna an zawng a, mahse zawrh a tla lo hle. Vawk pum rate pawh ni dang ai chuan a tlawm zawk a, mahse a hralhna a awm miau loh avangin vawk sa sat thin tan pawh lei mai ngam chi a ni lova. Vawk vulhtu te pawh an vawk chu an sat dawn anih pawhin a lei zo tur mihring an awm ang em tih hriat hmasak a ngai ta. Ni danga zo duak duak thin vawksa chu hmun hrang hrang ah a hnawng ta.

ZALEN in Aizawl a vawk sat thin pakhat a kawm chuan vawksa chu hralh a kal lo hle tih sawiin, "Mi tam takin vawk damlo leh a pul sa ei an hlauh avangin an lei ngam lo a, pakhat chauh pawh talh ila nilenga thutpui te a ngai thin a. Chuvangin talh hrih loh mai hi a fuh zawkin kan hria a ni," a ti. 

Vawk talh thin pakhat pawhin, "A hma chuan an inchuh hi a hrehawm kan ti zawk a, mahse tunah chuan kan sa a thianghlim thu sawiin midang te lei turin kan sawm ta zawk a ni," a ti ve bawk.

African Swine Fever vei vawksa ei hi mihring tan chuan a hlauhawm lem lo a, mahse a natna pudarhtu kan ni thei tih mithiam te chuan an sawi.