ZALEN January 12, 2025 : Mizoram sawrkarin village council dinglai term a pawh tawi vanga lungawi loa All Mizoram Village Council Association (AMVCA)-ten high court-a sawrkar an khinna chu naktuk hian court-in a ngaihtuah dawn.

Sawrkarin VC term a pawh tawi chhan a sawi chu pawm har an tih thu AMVCA chuan an sawi a. President K.Lalngaizuala chuan, “Democracy ram kan nih angin kan inthlang thin a, hetia a hun hmaa inthlantir hi democracy palzutnaah kan ngai a. Chu mai bakah VC zahawmna tihbawrhbanna a ni a, term pawh tawi chhan an sawi hi a nep kan ti hle a ni,” a ti.

Tuna village council hi August 27, 2020-a inthlang niin August, 2025-a tawp tur a ni a. LAD chuan tuna VC term hi February 19, 2025-a tawp turin ruahmanna an siam a ni.

VC term pawh tawi a nih vang hian AMVCA chu lungawi lovin Gauhati High Court, Aizawl Bench-ah sawrkar khinna an thehlut a, kumina court neih ni hmasa berah an khinna hi ngaihtuah a ni dawn a ni.