ZALEN November 29, 2024 : Mizo Hnam Run-ah chhung inkhawm chu vawiin khan neih a ni a, hun hnihna political session-ah MNF Senior Vice President Dr. R. Lalthangliana chuan 15th Finance Commission hnuaia post devolution an tih mai PDRDG a kiam chhoh nasat tak em avangin sum harsatna a awm lo theilo a, hei hi a hma daih atanga hriat lawk vek a nih thu a sawi.

MNF Senior Vice President chuan, "Kum 2021-2022-ah 1790 crore (thlatin 149 crore), 2022-2023-ah 1615 crore (thlatin 134 crore), 2023-2024-ah 1474 crore (thlatin 122 crore), 2024- 2025-ah 1079 crore (thlatin 115 crore) leh 2025-2026 ah 586 crore (thlatin 48 crore) chauh kan hmu tawh ang," a ti.

Dr. R. Lalthangliana chuan, "Kumtin kan pawisa hmuh tur hi kum 5 hma lamah kan hre lawk vek tawh a, urban local body leh rural local body atana kan sum hmuh tur, khu lamin min pek tur zat hi kan hre sa vek a. VC inthlan hma chhan tura LAD Minister-in a sawi nen chuan inpersan tak a ni," a ti.

"VC term September 7, 2025-a tawp tur chu nasa taka pawh tawi a niin, February 19, 2025 ah chhan leh vang mumal awm lovin sawrkar chuan a titawp a. Home Minister te, LAD Minister te, Health Minister leh Adviser to CM (Pol) thusawite hi a inang lo theuh a. Sum harsat vang tih te, thawhpui an harsa tih te, fur ruahtui tlak hma tihte an sawi dan a inanglo nuk mai. Sawrkar chuan a duh chuan thuneihna a nei teh reng mai a, mipuiin duh taka an thlante hi MNF leh Congress kha chuan kan sawisa ve vak vak ngailo," a ti bawk.

Dr. R. Lalthangliana chuan, "PDRDG tlahniam zel hi 15th FC-a kan luh tan, kum 2021-2022 atangin kan hre lawk vek tawh a. PDRDG a tlakhniam zel rual hian share of taxes a kan hmuh a pung chho ve zel thung a, 14th finance commission a kan hmuh loh, RLB Grant chu 15th FC ah hian kan hmu tha viau bawk a. Democracy ramah sum harsatna chhuanlama mipui thlan ngei, VC-te term pawh tawisak hi thil zahthlak tawp khawk a ni," a ti bawk.