Police-in mi sual an man hian a veng/khaw hming nen lam chanchinbuah leh TV lamah tarlan a ni thin. Chuveleh a veng/khaw chhalna khawtlang hruaitute chuan an veng mi dik tak a nih loh thu te, an venga a awm mumal loh thu te leh an veng mi anga chhiar theih a nih loh thu te thuchhuah siamin an tar lang thuai thin. Mahni veng/khua hmangaih nachang kan hria hi a tha a, a hmingchhiat pawh kan hlau tur a ni. Chutih rualin kan veng/khua hi mi sual pakhat vanga hmingchhe ta duai tur angte hian kan ngai deuh thin em? Veng ve reng ruang, khua ve reng ruang, kawhmawhbawl ching mi sual pakhat vang mai maia hmingchhe ta duai tur chu kan ni em dawn em maw ni le? Khawvel a ni miau a, khawi hmunah pawh mi sual leh mi tha hi kan inawm pawlh lo thei lo a ni.

America ramah khuan a khât tawkin pawikhawihna rapthlak a thleng fo mai. Ram zalen an ni a, silai a zalen bawk a, mi tinin silai an kawl fir fer mai. Hei vang hi ni maw, a khât tawkin mi sualin mipui an pawng kah chiam chang pawh a awm fo thin. Chung thilte avang chuan tuman a hnam angin American mipuite chu kan dem lo a, mi sual pahnih khat pawi khawih vangin hnam sual leh tharum thawh ching angin kan sawi ngai hek lo.

Mahni veng leh khua hmangaih nachang hriat hi a tha. Chutih rualin kan ngaihtuahna hian hawl zau deuh se a tha khawp mai bawk. Mizote phei chu kan la tlem em em a, a hnam ang leh khaw bil anga inla hrang nget nget tham pawh kan ni lo. A Mizo hnam ang pawha khawvel chu sawi loh, India ram dengchhuak khawpa hming that a har tehlul nen a Sailo ang te, a Pachuau ang te, a Paite ang tea inen hrang a, inla hrang tham hi kan ni mawlh lo mai. Kan veng thatna kan duh a, veng tana thahnem kan ngaih tho rual hian a hnam anga kan thatpui tur leh kan chhiatpui tur thilte hi vei nachang hria ila a tha khawp mai.

YMA zawnah pawh hian a ni tho mai. Branch YMA-a active tak, Central YMA hmalakna leh thuchhuah eng vak maha ngai lo, ‘Central YMA atangin no mawng pawp pakhat pawh kan la dawng lo’ tia tan khawh tui tui mai, an thahnemngaihna leh inpeknain branch bak pel hlei thei lo hi veng tin leh khaw tinah hian an awm fur mai. A Asia khawmualpui ang zawng te, a India ram ang zawngtea kan vei pha lo a nih pawhin Mizoram tal hi chu i vei ang u hmiang. Kan ngaihtuahna leh thahnemngaihna rilru hi veng bil leh khaw bilah hian tawp lo se a tha khawp mai.

Ram danga kan thalaipuite chuan khawvel boruak lo lum tial tial te, tuifinriat chim chin lo sang tial tial te, sik leh sa awm dan mumal lo tial tial te, ram ngaw chereu nasat avanga nungchate inrintawn dan (ecological balance) lo chiri ta tial tial te hi an vei a, mutmawh hnarmawhah an neih a ni. Tun kar chhoah khan Amazon ngawpui, mihringtena kan mamawh oxygen zaa sawmhnih ngawt pechhuaktu chu a kang diai duai a, ram hectare nuai 5 chuang a kang tawh a ni. Keinina eng he hua kan ngaih loh, news satliaha kan ngaih hi khawvel hmun danga kan thalaipuite chuan mutmawh hnarmawhah an neih a, an chaw ei a tui loh phah a sin. Anni chuan khawvel pum thatna tur an ngaihtuah a, mi zawng zawng that tlanna tur chu an vei ber a ni a, khaw bil/veng bil an ngaihtuah hman lo.

Mahni veng leh khaw bil tete kan hmangiahna rilru dan bo chuang lo hian kan ngaihtuahna hial hawl zau deuh se, he mizo hnam thatna tur tal hi chu i ngaihtuah tlang ang u hmiang.