Aizawl : Ningani a sawrkar lamin mipui tana bazar hun a siam-ah Aizawl DC chuan AMC huamchhunga mipui te zawm tur kalphung a duang. Veng pahnih LLTF phalna lovin veng dangah kal phal lo.

Veng tin LLTF ten mahni veng theuhah chawhmeh zawrhna hmun remchang an ruahman tura tih a ni a, mipui te chu mahni veng pela veng dangah bazar loh hram turin ngenna a siam. 

Ningani bazar ni-ah hian veng danga loh theih lova kal ngai te chu an awmna veng LLTF leh an kalna tur veng LLTF te inbiakremna anga ruahmanna siam sak te choh chhuah phalsak an ni. 

Wholesale dawr pan ngai emaw, a hlawma bungraw lak mamawh an awm chuan LLTF ah an in report ang a. LLTF te ruahmanna angin a hnuaia mi ang hian mamawh a lam theih ang. Mahni veng hnaih berah mamawhte hi lam tura tih an ni. 

AMC Ward I to X te hian veng dangah zing dar 7:00 leh 12:00 chhungin chak khai an lam thei ang a, Ward XI to XIX ten Dar 12:00 atanga 05:00 inkarah an lam thei thung ang.

Phai lam atanga chawhmeh lo lut te chu Commerce Industries Department (Commerce Wing) ruahmanna in Wholesale Market Building, Ngaizel, Kulikawn atanga sem darh thin tur a ni. Hemi hmunah Kulikawn LLTF ten a tul angin an lo puibawm ang.