Cricket Association of Mizoram (CAM)-in a vawi khat nana a buatsaih tur, veteran cricket tournament-ah team 25 an inlan dawn a, Aizawl khawpui pawn atang pawhin team thum an tel dawn.

1st CAM Veteran Cricket Tournament hi Thawhtanni atanga khelh tan tur niin July 1-ah khelh zawh tura ruahman a ni.

Twenty20 format-a knockout system (a chak lo apiang tlak nghal zel)-a khelh tur tournament hi Thawhlehni zan khan Verdant Multipurpose Hall, Laipuitlangah khuh hawn a ni a, fixture pawh nghal a ni a, team tin aiawh leh CAM OB ten an pawt a ni.

Veteran tournament-ah hian inkhelh apiangin team khelten Rs. 10,000 zel an hlawh ang a, Man of the Match thlan zel niin Rs. 1,000 an dawng ang.

Champion team-in Rs. 60,000 leh runners up team-in Rs. 30,000 an dawng ang a. A telte hi jersey tumsak vek an ni dawn a, final ni-ah ruai theh a ni bawk ang.

Khuhhawnnaah hian CAM president, organising committee chairman ni bawk, Lalrochuanga Pachuau chuan an pawlin tun dinhmun a thlen theih chhan te, tuna khelten sum tam tak an lakluh theih chhan te chu hranghlui, chawi belha cricket lo kalpui hram hramtute an nih thu sawiin, "Tun hi chawi belha lo inkhel thinte tana cricket-in a pek let vena hun a ni," tiin tournament an buatsaih chhan a sawi.

He hun hi team tel turte tan 'Insawitheihsiak Zan' atana buatsaih a ni tel a, team khat aiawha tel pahnih zelte chu an insawihtheihsiak bakah an lunglen thu te, hetiang huaihawt a ni hi an lawmthu leh CAM hruaituten hetiang ngaihtuahna an nei chu a lawmawm an tih thu te an sawi hlawm.