ZALEN, December 09, 2025: Rawlthar kum 16 hnuai lamte inelna, Vijay Merchant Trophy Plate khelh tanah Mizo rawltharte chuan Thawhlehni khan run 45-a Nagaland hnehin chakin bul an tan.

Vijay Merchant Trophy hi a inkhelten thawh (innings) hnih an neih theihna niin ni thum chhunga khelh zawh tura ruahman a ni a. Tun tuma Mizoram chak pawh hi Pathianni atanga khelh tan kha a ni.

Lalbhai Contractor Stadium, Surat, Gujarat-a inkhelah hian Naga rawltharte thum vawrah chakin vawm hmasak an thlang a. Mizoramin innings khatnaah run 136 siamin an thi kim.

Captain K.Vanlallawmkima chu run siam tam ber niin 30 a vaw chhuak a, Armed Veng, Aizawl rawlthar, Vanlalremsanga chhangtein run 20 leh Henry Lallawmzuala’n run 20 a thawh ve bawk.

Nagaland-in an thawh khatnaah run 167 an tlin a, Shivam Kumar Prasad (run 39) leh Abhay Tripathi (run 32) chu thawh tam pahnih niin Mizoram tan captain Lawma leh Henry-a ten mi pathum ve ve an vawm hlum.

Mizo rawltharte hi an thawh hnihnaah insiam tha hretin opener Lalduhsaka Sailo chuan run 30-in bul a tan a. Ramhlun Venglai, Aizawl rawlthar, Lawma bawk langsar leh berin run 43 a vaw chhuak bawk a, mi 10 an thih kimin run 169 an tlin.

Mizoramin tum hnih an thawha run vuak chhuak atanga Nagaland vawi khat thawh chhuah zat paih (305 - 167)-in chak turin Naga rawltharte hian run 139 an siam a ngai a. Hemi an umna kawngah hian run 93 chauh an tlinah Mizo bowler-ten an vawm thi kim hman vek.

An vawm vawi hnihnaah hian Bendangwapang Longchar chu Nagaland tana run siam tam ber niin run 36 a tlin a, a thianten Mizo bowler-te an ngam lo vau a, batter pali ngawt run siam miah lovin an thi a. Hunthar rawlthar Vanlalhruaizela’n mi pali vawm hlumin Lawma leh Pankaj Kumar Thapa ten mi pahnih ve ve an vawm hlum bawk.

Board of Control for Cricket in India (BCCI)-in a hnuaia association-te tana inelna a buatsaihah hian Mizoram hian group league-ah khelh hmabak pali an la nei a. Plate-a awmte an inkhelh kual chhuah hnuah a sang pahnihin final khelin champion-in season tharah Elite an kai dawn a ni.

INKHEL KHAIKHAWMNA:

Mizoram - 136 & 169

Nagaland - 167 & 93

Run 45-in Mizoram an chak.

MIZORAM KHELH HMABAK:

December 12-14, 2025 - Mizoram vs Sikkim

December 18-20, 2025 - J&K vs Mizoram

December 23-25, 2025 - Arunachal Pradesh vs Mizoram

December 29-31, 2025 - Meghalaya vs Mizoram