ZALEN, December 15, 2025: Rawlthar kum 16 hnuai lamte inelna, Vijay Merchant Trophy Plate-ah Mizo rawltharten Nagaland hneha bul an tan hnuah Pathianni khan Sikkim lakah wicket liin an chak leh ta.

Vijay Merchant Trophy hi a inkhelten thawh (innings) hnih an neih theihna niin ni thum chhunga khelh zawh tur (multi days) a ni a. Tun tuma Mizoram chak pawh hi Zirtawpni atanga khelh tan kha a ni.

Kholvad Gymkhana Ground, Surat, Gujarat-a inkhelah hian thum vawrah Mizoram chakin vawm hmasak an thlang a, an tifuhin bul an tan tha hle a; Sikkim-in run khat an siamin mi pathum an vawm hlum hman.

Hemi hnuah Arihanta Sachdeva chuan run 67 vaw chhuakin an state dinhmun a chawi kang a, wicketkeeper Shrishant chuan run 38 a thawn bawk a, a tawpah an thih zawh chuan run 191 an tlin theih.

Mizoramin an vuakah Nagaland lakah pawh che tha tawh, captain K.Vanlallawmkima chuan run 68 vaw chhuakin KC Lalpekhlua leh Joel K.Lalthlamuanpuia ten run 30 ve ve an thawh bawk a, Sikkim thawh khatna vuak chhuah tlin lo hretin run 179-ah an thi zo.

Sikkim vuak vawi hnihnaah Mizo bowler-te che tha lehzualin run 130 chiah an tlin a. Biswash chuan run 52 siamin batter paruk phei chuan run 10 an vaw chhuak tling lo vek a. Mizotam tan Henry Lallawmzuala, Joel-a leh Pankaj Kumar Thapa te chuan mi pathum theuh an vawm hlum.

Sikkim vawi hnih vuak hian Mizoram tan chak turin run 143 an tuk a, mi paruk thiin an run mamawh hi an thawk chhuak a. Zemabawk rawlthar rawlthar Henry-a’n a tawp thlenga damin run 60 a vaw chhuak a, captain Lawma’n run 40 a thawh leh bawk.

Board of Control for Cricket in India (BCCI) buatsaih Vijay Merchant Trophy Plate-ah hian team ruk awmin Mizoram hian vawi hnih hnehna an chang ta a, vawi hnih tho chak tawh Jammu & Kashmir hnuai chiahah awmin a sang pahnih an ni mek a, Ningani atang hian an pahnih hian a sang zawk nih inchuhin an inkhel zui ang.

INKHEL KHAIKHAWMNA:

Sikkim - 191 & 130

Mizoram 179 & 143/6

Wicket liin Mizoram an chak.