Aizawl: All Mizoram Village Council Association chuan sawrkar thawhpui duh lo Village Council an awm an hriat loh thu an sawi.

ZALEN in a biaknaah All Mizoram Village Council Association President K. Lalngaizuala chuan tunhnaia Minister pakhatin 'VC ten sawrkar an thawhpui that duh loh vanga VC term pawhtawi a ni mai thei' tih a sawi chungchangah boruak thlirin an la ngaichang tih a sawi a. "Press release hmangin sawrkar thawhpui duh lo VC an awm chuan kan hnena report turin kan ti a, tun thlengin report kan la dawng lo a. Hetianga sawrkar thawhpui tha duh lo an awm anih chuan zilh kan duh a, kan hriat chinah sawrkar thawhpui tha duh lo an awm kan hre lo a ni," a ti. Minister pakhat thusawi chungchang chu kar hnih khat ngaihchan phawt a, chumi hnua a tul dan a zira hmalak an tum dawn niin a sawi bawk.

June ni 10,2024 a ZPM Southern Hqrs. Lunglei chhung inkhawmah Health Minister Lalrinpuii chuan 'VC ten sawrkar an thawhpui that duh loh vangin VC term pawhtawi a ni mai thei' tih a sawi nia sawiin All Mizoram Village Council Association chuan Minister thusawi hian a barakhaih tak zet tih thuchhuah siamin an sawi a. Mahni hna pawh thawk hman lek loa khawtlang leh ram tan an buai em em laia hetiang thu an hre ta mai chu mak an ti hle tih sawiin, "Kan Health Minister in sawrkar thawhpui duh lo VC a tihte hi khawi VC nge ni a, eng kawngin nge an lo thawhpui duh loh tih min hrilh turin kan ngen a. AMVCA anga lo in zilh a, tha taka sawrkar thawhpui tura lo infuih thar leh hi kan inpeih reng a ni tih hi min lo hriatsak se kan duh hle," an ti a. Minister thusawi chu VC zahawmna tihbawrhbanna leh democracy pawng­sualna nia sawiin sawrkarin thawhpui a duh phawt chuan an inhawng em em niin an sawi bawk.

Aizawl City Local Council Association pawhin June ni 24,2024 khan thuchhuah siamin Health Minister in 'VC/LC te kan mi leh sa an nih loh avangin min thawhpui tha duh lo' tia a sawi chu an ngai thutak hle tiin khawi VC/LC nge thawhpui duh lo tih hriat­tir se an duh hle tih an sawi bawk.