Mizoramin inthlanpui vawi 3/4 vel a hmachhawnah Electronic Voting Machine (EVM) hman a ni a, vote thlak chhung chu a rei lo phah deuh chuan a lang a, mahse, Election Commission of India (ECI) lamin vote chhiar chhung rei lutuk tihzia-awmna a nih a beiseina erawh chu Mizoramah chuan tihhlawhtlin theih a la ni ve lo a, hei hian mipui nawlpui piah lamah, sorkar hnathawkte ngei pawh Information Technology lamah an la hniamzia leh vuaicha zia a lang thei. Nimin piah lawkah Lok Sabha MP thlannaa vote tla te chhiar a ni a, India ram mihring maktaduai tel awmnaah nikhat thil thu-ah vote tla zat kimchang a hriat theih titih mai a, Mizoram, MP pakhat bial, vote nei thei pawh mi nuai 4/5 awrh awmnaah nitla vanvuaia vote an chhiar chung pawhin final result an peih hleithei lo a, thil mak tak a ni. Mizoram inthlannaa EVM hman te hi a chhiar a harsa bik chu a nih a rinawm lo. Amaherawhchu, Mizoram aia mihring nuai tel takmeuha tamna, MP bial 50/60 awmna pawh kan tluk hleithei lo hi thil mak tak a tling. Mizoram MP vote tla chhiarna hi District tinah neih a ni a, state dang zawng zawng aia zo hma ber tura ngaih a ni a, zing dar 8 atanga chhiar tan a nih chuan chhun dar 1 velah chuan result kimchang hriat theih tawh awm taka ngaih a ni. Tripura-a Election Commission of India thu-a Mizoram Bru, Transit Camp-a vote thlakte vote tla zat nghah chhung chhuanlama hman hi chhuanlam dawrawm tak a ni ang. Vote chhiar chhung a rei loh phah lo a, ballot paper-a vote chhiar hun lai nen a danglamna a awm tehchiam lo bawk. Chuvangin, EVM lam rinhlelhna ni lovin, mi thenkhat, EVM ringhlel tlat an la awm tihreh nan te pawh Ballot Paper hmanga inthlanna buatsaih leh mai hi a finthlak zaw phian ang! Mizoramin inthlan a hmachhawn tawha EVM hman a nih dante ngaihtuahin, vawihnih khat te chu vote chhiar chhung lo rei ta pawh ni sela, thil thar a nih avangin a hriatthiam theih ang. Amaherawhchu, vawi 4/5 lai EVM hman tawh hnu-ah pawh vote chhiar zo hleithei lo state nih hi zah nachang hriat a tha khawp mai. Election-ah hian thawktu indaihlo hi thil mak a tling bawk. Election buaipui tura rawihte chu sorkar hnathawk vek an ni a, indaihloh tih hi chhuanlam tlinga pawm theih a ni lo ang. EVM hmanga inthlanna experience neih a ni tawh chung pawha heti taka rei vote chhiar a ni hian ngaih a titha lo letling zawk mai ang tih pawh thil hlauhthawnawm a ni. `Mizorama inthlannaah reng reng EVM hman a ni leh dawn a nih ngai chuan, state dang vote chhiar dan zir turte intirh hmasak hial a tha in a rinawm. Inthlanna vote tla chhiartute hi an muang lui ve hrim hrim chu a nih a rinawm chiah lo. Vote chhiar chhung a rei tih avanga pawhlah taka vote chhiar erawh chu thil dik a ni chuang lo bawk. EVM hmanga vote thlak a nih hnu-ah hian, experience neihna hman a awm tawh a, chvuangin, vote tla chhiar chungchangah Mizoram Election Official-te hian thil tih fuh loh emaw, hmaih thelh emaw chu an nei tih a chiang. Chu chu enge tih zawnchhuaha siamthat a pawimawh hle ang.