Aizawl April 3, 2024 : Mizo Students’ Union, General Headquarters, Aizawl thuchhuah bawhzui a MSU headquarters, Chawngte chuan an area ah Inner Line Permit (ILP) an enfiah a, ILP fello an hmuhchhuah, a rang lama renew turin an tih zinga ILP nei lo, ILP neih ngai lo anga Lawngtlai DC lo chhan dan chungchangah MSU an lawm lo a, a chhan sawifiah turin an ngen.

Mizorama Voter ID nei pakhat Chawngte khawchhunga mi Pran Gopal Sutradhar ID no. MBS1175182, Adhaar No.3380 6641 4257 chuan Chawngte-ah nupui Sabita Chakma a nei a, ILP a nei lo tih hmuhchhuah niin siam turin an ti a; amaherawhchu, Deputy Commissioner (DC) Lawngtlai chuan voter ID a neih avangin ILP a neih a ngaih loh thu a lo hrilh a ni.

Deputy Commissioner chhanna hi MSU headquarters, Chawngte chuan hriatthiam har an ti a, Voter ID nei ten ILP an neih a ngaih loh zel chuan Mizoram hi inchimralna lakah a derthawng hle niin an hria a, eng dan tlawhchhanin nge Voter ID nei ten ILP an neih a ngai loh tih sawifiah turin MSU chuan DC hi an ngen a ni.

Chawngte area ah hian hnamdang (Vai) sumdawng leh Mistiri, Mizoram-a Voter ID an neih avanga ILP an neih a ngaih loh thu an sawi thin. MSU chuan ILP leh Voter ID in inzawmna a neih loh thu hrilhin kum 1950 hma lama awm te chauh ILP an ngaih loh thu in an chhang thin thu an sawi.