– FJ. Lalhriatpuia

MLA inthlanpai kan zo ta. Polities thli hian awmzia a la nei reng a nih chuan ZPM party hi a malin an sorkar hmel.

CM candidate atana Val Upa Council-in an lo ruat lawk Pu Lalduhoma chuan CMO a luah ngei dawnin a lang a, duhsakna sang ber leh beiseina sang ber nen kan lo welcome e.

Pu Lalduhoma hi mihring famkim lo ve tho a ni a, serafim ang maia thianghlim famkim tura beisel bik tur a ni lo ang. Mizoram politics khelh dan thar leh sawrkar kalphung siam that a intiam ta sa sa, thil te reuh te te, tih hlawhitlin sam em em ah te hian chuan ding ngam turin beisei ang. A laka mipuiin kan beisei te chu hengte hi an ni.

1. Val Upa Council thu a zawm tawh tur a ni. Term hmasa lam khan Val Upate thu kha a pal zut thin tih hriat a ni a, a la zawm duh lo fo a nih chuan Val Upate pawhin an ban an vai ngam tawh tur a ni. Ban vai ngam lo VUC kan neih chuan, VUC laka mipui beiseina a bo tawh ang a. VUC ni zui zel tlak an ni lo tihna a ni ang. Hlauh nei VUC chuan kalphung thar sorkar a din thei hauh lo ang tih a rin theih.

2. Council of Minister ah a mah venpuitu tur DyCM ruat nachang a hre tur a ni. A dil duh a nih chuan vengtu awm lova lal hrawt a tum tihna a ni ang.

3. A CoM zingah zu in ching te, sum at chilh, sawrkhar party apianga pakai mai mai ching te, chiahpuam leh khehpuama lo in hnamhnawih tawh thinte an tel tur a ni lo; an candidate zingah khan hetiang vantlang hriata mi puitling ni lo hi an tel nual a, haider suh se, mipuiin kan MLA atan kan ngaidam, minister atan erawh kan pawm lo. Heng mite hian minister hna an chelh chuan, ZPM party a kan beiseina hi a bo zui thuai ang.

4. Tunah Pu Duhoma hi kum 74 inchhal in kum 76 na a hmang mek a, MLA inthlan leh hun kum 2028 ah chuan kum 80 a bang liam ve tawh dawn a, MLA chuh rual a ni tawh dawn lo tih atangin a inpawm tur a ni a, a politics hun tawp khar nan, CM hming tha tak nih nachang hre mawlh mawlh rawh se. Mahnia chawlh na chang hre lo chu mipuiin an chawlhtir tho tho tih hi hai ve hauh suh se.

5. Kohhran Upa zu in, zinnaa hmeichhia hruai thin tia puhna hi mi tam zawkin kan pawm lo a, insawifiah phet tum tawh suh se, a ti rinhlelh awm zawk mah a ni.

6. A mizia thlak tum buai tingtang duh suh se. Biak nuam nih tuma lemchan a ngai lo, CM clean tak ni se, kut tling takin hna thawk se, a tawk mai.

7. Phai lam party BJP, TMC, AAP, NPP leh construction company thenkhat hnen atangin campaign fund a dawng a, party ah a thehlut lo va, a pumbilh ni awma sawisep awm hi VUC te hian eng tin nge an ngaih aw? An ngaizam dawn nge an zawt chhuak dawn? Vai party lak lo dawng tak tak a nih chuan sawrkar thar lo piang tur chu a hnar a nu hle dawn tihna a ni mai a, mipui kan va rethei zui dawn em!

8. Sawiselbo Chief Minister kan beisei lo a, bawlhhlawh thian ngam CM kan lo beisei dan a ni.