Wrestling Federation of India (WFI) Vice President Asit Kumar Saha chuan Mizo wrestler-te kawmin hma an sawn theihna tur a nih chuan puih a inhuam reng thu a sawi.

Mizoram State Sports Council (MSSC)-in ni hnih chhung Mizoram Sports Conclave a buatsaih chhima Mizoram tlawhtu, WFI vice president hian Zirtawpni tlai khan Mizoram Wrestling Association (MWA) Training Hall-ah a tlawh a, hruaitute leh wrestler-te nen an inkawm.

Saha chuan Mizo inchai chakten hmasawn an duh chuan puih a inhuam reng thu a sawi a. MWA hnuaiah referee & judge, short term refresher course pawh mumal zawka neih theih dan tur ruahman a inpeih thu a sawi bawk.

Mizo wrestler-te chu tlangmi an nih angin ke lam a chak tha sa a, taksa chung lam tihchak belh chuan theihna nasa tak an neih a rin thu a sawi.

Saha chuan an pawlah pawh Mizorama wrestling-in hma a sawn theihna turin puih a inhuam reng thu a sawi bawk.

Mizoram Sports Conclave-ah hian Saha hian Ningani tlai khan Mizorama infiam miten 2036 Olympic Games-a medal an lak theihna tur kawnga pawimawh a tih zawngte a sawi chhuak tawh bawk.

MWA Wrestling Hall, Ramhlun Sports Complex-a WFI vice president lawmna hmunah hian MWA chuan Mizo thuam thenkhat an lo pe.