WhatsApp chuan an elpui, Telegram leh Signal-ah pawh tihtheih angin message thawn tawhte siam that (edit) theih turin an ti dawn tih an sawi.

Firm hian thawn chhuah tawhte chu minute 15 a ral hma thleng a siam that theih dawn niin an sawi.

Instant-messaging service WhatsApp hi Facebook leh Instagram pawh neitu, US technology giant Meta ta a ni.

Feature thar hi WhatsApp hmangtu mi tluklehdingawn hnihten hun reilo te-ah an hmang thuai thei dawn a. India hi hmangtu tam berna ram niin maktaduai 487 vel hmang an awm.

Messaging service hian Thawhtanni khan an blog-ah, “Chhut sual palh siam that lehna bakah chhut belh duh pawh a tihbelh thei tawh dawn a, zau zawka in inbiakna in thunun theihna tur pek cheu hi kan châk tawh hle,” an ti.

“I message thawn tawh chu rei deuh hlek i hmet (long-press) ang a, menu-a ‘Edit’ tih lo awm atangin i thawn atanga minute 15 thlengin i siam tha leh thei dawn a ni,” an ti.

Hetiang message siam that leh hi ‘edited’ tiin a lang a, a lo dawngtu pawhin a hre nghal thei dawn a. Thawn atanga engtia reiah nge siam that a nih tih erawh a hre ve lo vang.

WhatsApp-in feature thar an neih tur an puan hma lawk hian messaging service lian pahnih, Telegram leh Signal chuan hetiang hi an lo puang tawh.

Social media platform lian tak, Facebook-ah chuan thu tar lan edit theih hi kum 10 dawn liam ta atang khan a awm tawh.

Edit theiha siam a nih tirh hian Facebook chuan a hmangtu zahve aia tamin mobile phone atangin an khawih a, thu chhut sual a awl bik avangin tihdanglam leh theiha dah hi a tul niin an sawi.

Facebook-ah pawh hian thu tar lan tawh tihdanglam leh hi ‘edited’ tiin a awm zel a. Hei hi a lo hmu apiangin an hre nghal thei.

Nikum khan Elon Musk-a social media platform Twitter chuan pawisa chawia hmangtuten an thil tar lan (tweet) an siam that leh theihna an siam a. Tweet-te hi minute 30 ral hmaa tihdanglam leh theih a ni.