Aizawl: Association for Environmental Preservation (ASEP) General Headquarters hruaitute chuan India ram pum huapa Tiger census beihpui kal meka Dampa Tiger Census beitu leh final census ti tura lo kal, National Tiger Conservation Trust (NTCA) leh Wildlife Institute of India (WII) lam tirh Priya Singh chu Zirtawpni khan Lengpui Airport-ah lo hmuakin titi puina hun an hmang a. ASEP aiawh hian President K. Lalmuansanga leh ASEP for Dampa Committee Chairman Lalzarzova te an kal a ni.   Priya Singh-i’n a sawi dan chuan Dampa census hi 60% vel chu thawh zawh a ni tawh a, tunah hian a tawpna ber atan an bei leh dawn a. Nikum November thla atang khan census hi a hmunah luhchilhin an lo bei tawh a. Priya-i hian tum danga mipa pawhin an luh ngam loh leh an la luhchhuah ngai reng reng loh hmunte nen lam a luhchhuak a, tunah chuan census hi chawlh leh chawlhni pawh sawi lovin ngawrh taka beih chhoh a ni tawh dawn a ni.   Dampa ngawpui chhung atang hian sahel ei chi ek zirchian turin sample 200 chuang zet lak a ni tawh a. Census thawh zawh a nih ve leh hengte hi enfiah leh zirchiang turin DNA analysis neih a ni ang a, eng species nge tih leh eng zat nge tih report chu WII lam hian March thla velah an tichhuak dawn niin hriat a ni.