Grand Slam inelna ngaihhlut hlawh Wimbledon khelh mek chu zanin hian final khelh a ni dawn a, mipa single final-ah Champion lai Novak Djokovic leh Matteo Berrettini an in hmachhawn ang. 

Wimbledon-a tum nga lai champion tawh Djokovic hian final lut turin semi-finah-ah Denis Shapovalov chu harsa takin straight set-in a hneh a, semi-final leh lamah Matteo Berrettini chuanHubert Hurkacz chu hnehin final a lut thung. Berrettini hi Italian zinga Wimbledon mipa single final lut thei hmasa ber a ni nghe nghe.

Queen champion lai seeded pasarihna Berrettini hian final lut turin Poland mi Hurkacz chu 6-3, 6-0, 6-7 (3-7), 6-4 in a hneh a, Wimbledon champion lai leh Grand Slam title 19 zet hum haw tawh Djokovic hian final lut turin Canadian Shapovalov chu 7-6 (7-3), 7-5, 7-5 in a hneh ve bawk.

Semi-final hnuhnug zawk inhnehtawk takah hian Shapovalov lakah Djokovic hi a tlawm teuh hle a, a thiamna leh a experience hmang tangkaiin Djokovic hi a ding chang ta zawk a ni. Straight sets-in hnehna chang thei mahse, insawi thei tur a awm bik chuang lo a ni.

Final-ah hian Djokovic hi a chak a nih chuan Grand Slam title la hnem ber pahnih Roger Federer leh Rafael Nadal-te nih rual chiahin title 20-na a hum haw ve thei dawn a, theihtawp a chhuah ngeiin a rinawm. 

Kum 1976 hnu Italian mi Grand Slam final lut leh hmasa ber Berrettini hi Italian mi Wimbledon mipa single final lut thei hmasa ber a ni bawk.