DOWNLOAD OUR APP

Read latest news on your phone
app-store

Women Reservation chungchang hi

Mar 08, 2014

Women Reservation chungchang hi

Nimin kha 'Khawvel puma Hmeichhiate Ni' (International Women's Day) a ni a, he ni hi Mizoramah Aizawl leh District thenkhatah hman a ni a, hetah hian hmeichhiate pawimawhna leh an mawhphurhna chungchang bakah, India dan hnuaiah hmeichhia te leh mipate chu an intluktlang vek tihte zirho a ni a. Mamit-a he ni pual inkhawm buatsaih hmanpuitu, Mamit District Legal Services Authority hotu pakhat chuan, India dan hnuaiah mipa leh hmeichhiate an intluk tlang vek tih a sawi a, hei hi thudik a ni. Hun engemawti atanga India rama sawi hlawh leh khel hlawh tak mai chu hmeichhia te tan ram rorelna In (Parliament)-a seat hauhsak (reservation) chungchang a ni a, hei hian Mizoramah pawh sawi a hlawh hle a. Mizorama hmeichhe pawl, a bikin Mizo Hmeichhe Insuihkhawm Pawl (MHIP) phei chuan langsar takin Legislative Assembly member thlanna neih thinah, hmeichhia candidate-a dah turin political party te an ngen awl lova, Aizawl Municpal Council (AMC) ah phei chuan hmeichhiate tan reservation siam niin, mipa te tana chuh buai theih loh an ni hial a, tunah hian AMC-ah hmeichhia engemawzat an awm mek a ni. India ram hmun dangte ngaihtuahin, Mizo hmeichhiate hi an zalen em em a, chhungkaw ro thil inrochun danah pawh an dinhmun a tha chho zel a, fate zinga mipa vulh bik emaw, ro sem thu hla-ah pawh chhungkaw tamtak chuan an fanute an dah pawimawh em em tawh a ni. Sorkar hnaah a ni emaw, sumdawnna thilah a ni emaw, kawng tamtakah hmeichhiate hi hmahruaitu an ni chho deuh reng tawh a, sorkar office hrang hrangah pawh a tam zawk chu hmeichhia an ni deuh fur tawh bawk. Heti chunga mipa leh hmeichhia intluk tlanna thu leh, reservation auchhuahpui reng hi a tul ber em? tih hi ngaihtuah tham tak a tling a ni. India ram state thenkhatah chuan Chief Minister hmeichhia an ni a, national party zingah pawh a meizang hlapa India ram hmelhmang nasa taka tidanglam thei an the fur tawh bawk. Heng hmeichhiate hi Reservation atanga lo ding chhuak an ni meuh lo a, anmahni inhai kuaa harsa taka an beih hnu-a India ramin a hriat lar chhoh takte an ni fur hlawm. Hmeichhiate hian ngaihtuah chiang tak tak sela chuan, Reservation mamawha an inhriatna hi mipa nen an intluk tlan lohna finfiahtu a ni lek zawk em? Hauhsak bik an ngaih chhung chuan mipa nen an intluk tlang lo tihna a ni thei zawkin a lang. Hmeichhiate hi pianphungah mipa aia awm nem zawk, dimdawih ngai, rilru no, ngaihsaktu mamawh, Pathianin a siam dan phungah pawh mipate tanpuitu tur an ni a. Kristianna atanga thlir phei chuan, 'hmeichhe lu chu mipa' a ni a, 'mipa lu chu Krista' a ni tih a ni. Mipa tih ang engkim ti ve vek tura inngaihna leh, an tih theih ang apiang tih ve vek tumna ang rilru hi, chhungkaw lama an mawhphurhna ngaihtuah chuan a huamhauh thlak deuh mai thei! Hnamdang hmeichhiate reservation atang kher lova Chief Minister hial an nih theih chuan, Mizo hmeichhiate pawhin an tum tak tak chuan Chief Minister an nih theih lohna chhan tur a awm bik lo vang.
Share now