ZALEN, December 23, 2025: Women’s Under-19 One Day Trophy (Plate)-ah Jacinta Laltanpuii chuan half century vaw chhuak leh mah se final-ah an hneh tawh, Tripura lakah Mizoram a chakpui zo ta lo va, wicket liin an tlawm.

Lady Amritbai Daga College Ground, Nagpur, Maharashtra-a final khelhah hian New Chalrang tleirawl hian ball 50 a hmachhawnah a tawp thlenga damin run 52 a siam a, 4 runs vawi sarih a vua a, Mizoramin over 50 chhunga run 175 an tlin theih nana thawh hlawk ber a ni.

Jacinta-i hian final-a Tripura laka half century a siam nen hian a zawna a vawi thum siamna a ni ta a. A hma chiah khan Meghalaya lakah run 55 leh Arunachal Pradesh lakah run 58 a lo siam tawh bawk.

Mizoram hi thum vawrah chakin vuak hmasak an thlang a, hma takah wicket hnih hloh nghal mah se inkhel hnuhnung bera Meghalaya lakah century siam, opener Vanlalruatpuii’n run 45 a thawk chhuak a. Mercy Lalramhmachhuani’n run 26 a thawk chhuak bawk.

Group stage-ah khan Mizoram hian Tripura hi kar hmasa Thawhtanni khan wicket thumin an lo hneh tawh a, hemi tum hian run 153-ah Tripura hi an vawm thi vek thei a, champion turin beisei a sang hle.

Season hmasaa Elite atanga tla, Tripura hian chak tura an mamawh run an run siam lova opener Anuska Shil a thih hnuah fimkhur taka khelin Mizo bowler-ten an vawm hlum hlei thei lo va. Opener pakhat Anjel Paul-i’n run 33 vaw chhuakin captain Ashmita Debnath-i chu a tawp thlenga thi lovin ball 94 a hmachhawnah run 65 a vaw chhuak bawk a. Over 47.3-ah an mamawh run an thawk chhuak a ni.

Final-ah hian Debnath-i hi Player of the Match-ah thlan niin Player Of The Series-ah vawi ruk khelha run 313 vawi chhuaktu, Tlangnuam tleirawl, Ruatpuii chu thlan a ni bawk.

Mizoram Women’s Under-19 team hi Twenty20 Trophy (Plate)-ah lo champion tawhin season tharah Elite-ah an khel dawn a, one day-ah pawh hian beiseiawm ber niin group stage-a an khelhpui panga an hneh vek a, final-ah a vanduai zawkah an tang ta hlauh a ni.

INKHEL KHAIKHAWMNA:

Mizoram - 175/5 (Over 50)

Jacinta Laltanpuii - 52* (50)

Vanlalruatpuii - 45 (99)

Tripura - 177/6 (47.3 Over)

Asmita Debnath - 65* (94)

Anjel Paul - 33 (77)

Wicket liin Tripura an chak.