ZALEN, December 21, 2025: Tlangnuam tleirawl Vanlalruatpuii’n Mizoram tan a vawi khat nan century a siam a, Women’s Under-19 One Day Trophy khelh mekah Meghalaya lakah run 152-a a team chakpuiin Plate final an luh tawh an nemnghet a, Thawhlehni hian an hneh tawh, Tripura nen final an khel ang.

Ruatpuii hi a tir atanga lutin a tawp thleng a dam a, ball 156 a hmachhawnah run 115 a siam a, 4 runs vawi 13 leh 6 runs vawi hnih a vaw chhuak.

Pathiannia VCA Stadium, Civil Lines, Nagpur, Maharashtra-a Women’s Under-19 One Day Trophy (Plate) group inkhel hnuhnung berah hian thum vawra chak Mizoramin vuak hmasak an thlang a. Hma takah wicket hloh nghal mah se Ruatpuii a chet that bakah an khelh hnuhnung bera Arunachal Pradesh laka half century lo siam tawh, Jacinta Laltanpuii’n run 55 thawh lehin over 50 chhungin mi paruk thiin run 229 an tlin.

Meghalaya-in an umnaah run an siam hmain wicket an hloh nghal a. Over 25.3 chhungin run 77 chiah tlinin an thi zo va. Mizo bowler Saron Lalremkimi’n over ruk a vawmah run 12 chiah pein wicket thum a la a, Jacinta-i leh Zothanmawii Rokhum ten mi pahnih hnih ve ve an vawm hlum bawk a, nuam sa takin an chak.

Meghalaya tleirawlte laka Mizoramin hnehna an chan theih nana thawh hlawk ber, Ruatpuii hi tun hnai lawka an champion-na, Women’s Under-19 Twenty20 Trophy (Plate)-ah khan vawi nga a khelhah run 190 siamin Player of the Tournament-a thlan a lo ni tawh nghe nghe.

T20 Trophy-ah hian Sikkim lakah ball 66 a hmachhawn atangin run 92 a lo a, over 20-a khelh chi inelnaa Mizo hmeichhiain tum khata run a vuak chhuah tam ber record a ni bawk.

Women’s Under-19 One Day Trophy (Plate) khelh mekah hian Mizo tleirawlte hi Meghalaya an hmachhawn hma pawhin a hma vawi liah an chak vek avangin final an lut chiang tawh a, khelh nganaah an chak leh nen vawi nga an khelhah an chak vek ta a ni.

Final-a an hmachhawn tur, Tripura pawh hi kar hmasa Thawhtanni khan wicket thumin an lo hneh tawh a. Thenawm state hi season hmasaa Elite atanga Plate-a tla niin tun season-ah hian team tha bera ngaih an ni a, final-a chak zawk zawk hian season tharah Elite an kai thei dawn a ni.

INKHEL KHAIKHAWMNA:

Mizoram - 229/6 (Over 50)

Vanlalruatpuii - 115* (156)

Jacinta Laltanpuii - 55 (72)

Meghalaya - 77/10 (Over 25.3)

Saron Lalremkimi - 3/12 (Over 6)

Zothanmawii Rokhum - 2/12 (Over 4.2)

Run 152-in Mizoram an chak.

FINAL:

December 23, 2025 - Tripura vs Mizoram