ZALEN, December 16, 2025: Champion tura rinkai, Mizo tleirawlte chuan Women’s U-19 One Day Trophy Plate-ah hnehna an chang leh ta a, Thawhtanni khan wicket thuma Tripura hnehin a hmain Sikkim an lo hneh tawh bawk.

Board of Control for Cricket in India (BCCI) Women’s U-19 One Day Trophy Plate group match inkhel vawi hnihna hi Vidarbha Cricket Association Stadium, Jamtha, Nagpur, Maharashtra-a khelh niin thum vawra chak Tripura-in vuak hmasak an thlang.

Over 50 chhungin run 153 an siam a, an thi kim hman chiah bawk a. Ashmita Das chu wicket hnih an hlohva lutin a tawp thlengin damin run 64 a siam a, opener Anjel Paul-i’n run 33 a thawh bawk a. Mizoram tan Jessica Lalmuanpuii’n mi pathum vawm hlumin Florence Beihropathaingia-i’n wicket hnih a la bawk.

Mizoramin chak tura an mamawh an umnaah bul an tan che lo va, opener Vanlalruatpuii a thih hnuah bul a tanpui, K. Lalnunfeli (run 39) leh Karie Chakma (run 19) chuan hmanhmawh a ngai lo tih hriain muangchang leh inringtawk takin an vua a. Karie leh Jacinta Laltanpuii an thih leh hnuah Lalnunmawii’n run 27 thawh veleh bawkin over 48 chhungin mi pasarih thiin an mamawh run 154 an thawk chhuak. 

Mizo tleirawlte hi November thla khan Women’s U-19 Twenty20 Trophy Plate-ah an lo champion tawh a, tun inelnaah pawh hian nomawi la leh tura rinkai an ni a, khelh hnihah chak ve vein point riat hmu tawhin Manipur nen hma an hruai.

Nilainiah hian thenawm state nen hian an inkhel dawn a, a chak zawkin an intlansan dawn a ni.

INKHEL KHAIKHAWMNA:

Tripura - 153 (Over 50)

Ashmita Das - 64* (105)

Anjel Paul - 33 (52)

Mizoram - 154/7 (Over 48)

K.Lalnunfeli - 39 (130)

Lalnunmawii - 27 (27)

Wicket thumin Mizoram an chak.