Aizawl; Kumin chhungin Mizoram Building & Other Construction Workers’ Welfare Board (MBOCWWB) chuan an member 114 boral (natural death) chhungte hnenah death benefit Rs. 1,14,00,000 a pe tawh a. Covid-19 package mi 356 hnenah Rs. 75,56,000 a pe tawh bawk.

Labour, Employment, Skill Development & Entrepreneurship department hnuaia MBOCWWB chhinchhiah danin, kumin chhunga death benefit pek mi 114-te hi cheng nuai khat theuh pek an ni a, benefit pekah hian accident-a thi an awm lo a, natural death vek an ni. 

MBOCWWB a tanpuina dil, an member Covid hri kai mi 1,708 an awm tawh a, chung zinga 422-te chu home isolation a awm niin, mi dang 1,283-te chu enkawlna hmun dang, 4C, ZMC leh 3C-a awm an ni. MBOCWWB member Covid vanga thi mi pathumte hnenah Rs. 3,00,000 theuh pek an ni tawh bawk.

Covid hri kai tanpuina pek tam berte chu Aizawl district (1,545) an ni a, Saitual, Lawngtlai, Hnahthial leh Khawzawl district atangin tanpuina dil an la awm lo. Serchhip district atangin mi pakhat, Kolasib atangin mi 112, Lunglei atangin mi pakhat, Champhai atangin paruk leh Siaha district atangin 43 dilna lut a awm tawh. 

MBOCWWB member hnathawhna hmuna chetsual avanga boralte chu Rs. 3,00,000/- thleng pek theih a ni a, an hnathawhna kaihhnawih ni lo leh chhan dang avanga boral an nih chuan Rs. 1,00,000/- pek theih a ni thung.

WORKERS MEMBER NIH DAN
Registration fee Rs. 25/- a tirah pek a ngai

Thla tin membership tihnun nan Rs. 10/- pek ziah a ngai a, thla tin pe lovin kum khat atan Rs. 120/- pek lawk theih a ni.

India khua leh tui dik tak, kum 18-60 inkar, kum khat chhunga ni 90 tal inhlawhfate chu member an ni thei.