Aizawl June 28, 2024 : Vawiin khan Women & Child Development Department buatsaihin Secretariat Conference Hall, MINECO ah State Level Orientation cum Workshop on Mission Shakti leh Beti Bachao Beti Padhao (BBBP) neih a ni. Workshop hawnna inkhawmah Health & Family Welfare Minister Lalrinpuii chu khuallian a ni.

Mission Shakti leh Beti Bachao Beti Padhao te hi sawrkar laipuiin hmeichhia harsatna tawkte tanpui leh an dinhmun chawikan a, hmeichhe naupang te humhim leh zirna pek a nih theih nana a ruahman a ni.

Khuallian chuan 100 days Awareness Campaign under SANKALP-HEW hawnna hun a nei a. 100 days Awareness hian a tum ber chu Women Schemes hrang hrang an neihte tangkai zawka mipuiin an hman theih dan tur te, ram leilung humhalh a nih theihna tura thingphun uar te, dan leh hrai in hrilh hriatna kawnga zau zawk a hmalak te leh hmeichhiate dikna chanvo inhrilh hriatna hun hman a ni.

Health Minister chuan, vawiin hun hman a nih chhan chu hmeichhe naupang te chhanhim a, thiam zir tir tur tih kha a nih thu a sawi a. Hetah hian sawrkar laipuia Ministry-in a beisei angin, department hrang hrang te thawhhona a pawimawh zia hriat tlan leh zual a pawimawh thu te, program ti hlawhtling tura thawhhona tha neih a tul thu a sawi. Health Minister chuan Ministry in min beisei angin, he programme ti hlawhtling tur leh 100-days awareness cum enrollment drive nei turin department tin ten inbuatsaih turin a sawm.

Mission Shakti hnuaiah hian Mizoramah pawh district pariat ah One Stop Centre te siam niin, hmeichhia thlabar leh harsatna tawkte mikhual nan hman a ni thin a. District thar pathum a OSC hi din turin ruahmanna siam mek a ni. Hemi bakah hian hmeichhia leh naupang ten phone hmanga an harsatna te an thlen theihna tur Helpline siam a ni bawk a. OSC leh Helpline ah hian domestic violence (kawppui/ chenpui te kut tuar) avanga a puihna dil an tam ber a ni. Heng bakah hian Shakti Sadan (Integrated Relief & Rehabilitation Home) leh hamthatna dangte din a ni bawk.