- Lalrinngheti Sonset, III Semester, Psychology Dept.
Govt Aizawl West College
ALORA - Centre for Well-being

Kumhlun lo tur khawvelah hian thil hrang hrang ka tawng a, thenkhat an hlim em em laiin thenkhat chu beisei tur nei tawh  lo nia inhria an awm a, chu nun thim tak atang chuan thiltih hmanga hian beiseina kan siam thei asin.

September ni 10 hi ‘World Suicide Prevention Day’ a ni a, thupui atan chuan “Creating Hope through Action” tih a ni a, thiltih hmanga beiseina siam ti te pawhin kan sawi thei ang a, hei hi kan ngaihpawimawh hmasak ber tur a ni awm e.

Hringnun tawiteah hian hlutna hre zo lo khawpa nung a awm theih a, heng zirlai avang te, ngaihzawng inthen avang te, sum lama tlakchhiatna avang te, hmangaihte thihna avang te leh chhan hrang hrang a awm thei ang. Bible-ah chuan kan damchhung kumte chu kum sawmsarih a ni a, chakna avangin kum sawmriat pawh a ni thei (Sam 90:10-ah kan hmu a) Chutiang kum pawh thleng zo lo kan va tam em! Beiseina nei tawh lo tan thiltih hmanga kan puih ve theihna te chu anmahni ngaihsak a, ngaihthlak te, an harsatna te hriatthiampui a, sawipui te hi a ni a. 

Zirna huangah pawh zirtirtu ten zirlai te hriatthiam a, khaikhin loh te hi a pawimawhin a tul em em a, khawtlang leh Kohhran-ah pawh rilru lama harsatna nei te hmuhhniam loh te leh chhawmdawlna kawnga tan lak chungchang te hi inzirtir tam a, uar zel hi a tha awm e.

Mizoramah mi nuai 12.38 kan cheng a, chumi zinga I lo piang ve mai hi tihpalh thilthu a ni lo, I hlu asin, chhan nei lova piang lah kan awm miah si lo. Hawh u kan piang ta sa sa ‘thiltih hmanga beiseina petu’ nih theuh tum ila, chu chuan keimahni, chhungkua, khawtlang leh khawvel thlengin kan timawiin, kan ti eng thei dawn a ni.