Russian state TV chuan Indopui pathumna (World War III) a intan niin a puang a, he thu hi Moscow-in Black Sea fleet, Moskva-a kangmei a chhuah hnua a pil tih an finfiah hnuah he thu hi a puang a ni.

Indona avang hian Ukraine sipai 3,000 chuang an thi tawh niin President Zelenshy chuan Inrinni khan a sawi.

Russia chuan Ukraine rocket siamna hmun chu Black Sea-a an indo lawng an chan hnuah a bei zui nghal a, Zirtawpni khan Pentagon chuan an lam tang Kyiv lamin Moskva chu cruise missile hmanga kah pil a nih thu a puang a ni.

Hemi hnu hian Russia chuan Ukraine khawpui bula internationa airport hnaih taka awm Vizar plant chu a bei zui nghal bawk. Russia chuan kar kalta atang khan an sipai te chu Ukraine khawpui Kyiv atangin hnukkir mah se, Russian tawng hmang tamna khawchhak lamah tan a khawh chho leh a, chutihrualin Zirtawpni a thil thleng hian Kyiv hi a la him chuang lo hle tih a tilang chiang hle.

Moscow chuan Kyiv bula anti-aircraft leh anti-ship missiles siamna hmun an beih chhan chu Ukraine helicopter-in Russian thingtlang khaw pakhat a beih vang niin an sawi a, Ukraine thung chuan kut thlakn an nei lo an ti ve thung.

Hetihlai hian Zirtawpni khan Bucha-ah ruang 350 aia tam hmuhchhuah a ni, Kyiv Region Police Chief Andriy Nebytov chuan civil mi ruang 900 chuang an hmu tawh niin a sawi.

Ukraine hi ram dang siam hmanrua engemaw zata tanpui an ni tiin Russia chuan a sawi a, chung zingah chuan Javelin missile system chu a langsar tak a ni. Russia chuan United States chu he thilah hian inrawlh tawh lo turin a ti a, Ukraine chu hmanrua a pe chhunzawm zel anih chuan a hriatthiam theih loh tur thu a sawi a, an chungah eng pawh thleng se an cho chhuahah a ngaih tur thu BIden-a hnenah an thawn a ni.

US chuan Ukraine chu an invenna tur hmanrua an pek tur thu a lo sawi tawh nghe nghe a ni.

Russia chuan an Black Sea Fleet cruiser Moskva sunna hun an hmang a, Russian indo lawng chhuan tawlawl pil chhan tak hi sawi fak theih a la ni lo a, Kyiv chuan an missile in he indo lawng hi a kap fuh an ti a, lawng captain pawh hi a thi niin an sawi a, mahse, fiahna a awm rih lo.

Germany chu tunah hian EU ram dang te chuan nasa takin an nawr mek a, Russia atanga a thil lakluh te chu titawp turin an ti a, mahse, tun dinhmunah gas a mawh zat atanga 40% hi Russia atanga a lakluh niin, Oil a mamawh zat atanga hmun li a thena hmun khat hi Russia atanga a lakluh bawk a ni.

Vawiin Easter-ah pawh hian Ukraine a biak In zawng zawng te chu khar vek a ni dawn a ni.