July 31, 2023; Aizawl District Level Task Force on Ruihhlo Do hmalaknain tukin (31.07.2023) dar 7:00 khan Aizawl khawpui chhunga Branch YMA hrang hrangah YMA Chhang ten Ruihhlo laka fihlim turin intiamna hun an hmang.

Ruihhlo laka intiamna thu (pledge) siam sa hmangin naupangten intiamna thu hi an sawi rual a, hmun thenkhatah chuan ruihhlo that loh zia chungchanga infuihna hun an hmang nghal bawk.

Aizawl District Level Task Force chuan he hun hlawhtling taka hman a nih theihna tura theihtawp chhuahtu Central YMA leh City Branch hrang hrang hruaitute chungah lawmthu a sawi.

Aizawl District Level Task Force on Ruihhlo Do Committee hian naktuk ni 1.08.2023(Thawhlehni) hi Aizawl District pum huap ‘Ruihhlo Do Ni’ atan an puang a, hemi pual hian chawhma dar 11-ah Vanapa Hall ah hun an hmang dawn a. Hetah hian Aizawl District huamchhunga YMA Branch aiawh mi 2 theuh, MHIP leh Local/ Village Council aiawh 1 theuh kal turin ruahmanna an siam bawk a; Er. Lalrinawma, Minister, Social Welfare & Tribal Affairs Department in a hmanpui ang.