Aizawl: Nimin khan Central YMA Office Bearer te chuan Chief MinisterZoramthanga chu a pisa ah an hmu a, ni 24.5.2021-a  Central YMA in All Party leh NGO Joint meeting a koh a Resolution an siam te an thlen a, tihhlawhtlin a nih ngei theihnan hma la turin an ngen. Chief Minister hian All party & NGO joint meeting thu chu lo enzui a tum thu a sawi. 

Central YMA hruaitute hian nimin vek chawhnu khan Muanna Venga Thutak Nunpuitute Team ( TNT) Centre tlawhin tanpuina sum fai Rs. 794,640/- an hlan. Tunhnaia TNT a Covid -19 kai engemaw zat an awm avangin anmahni tanpuina tur Central YMA chuan mi thahnemngai ten sum an thawhkhawm theihna tur remchang a siam a. Central YMA sum atanga pek chhuah bakah YMA Branch, Group YMA leh mimal, chhungkua inphal ten Central YMA a an thawh tlingkhawm chu an va hlan a ni. Central YMA chuan TNT tanpuina atana sum thawhtu YMA Branch, Group YMA, chhungkua leh mimalte chungah lawmthu a sawi.