Aizawl: Central YMA-in Manipur buaina avanga raltlante chawlh lailawkna atana a hman transit camp-ah mi 500 chuang an lut tawh a, heng mite hi a remchan dan angin veng hrang hrangah semdarh leh thin an ni a. Hetih lai hian raltlan rawn lut hi an tlem hret hret a, mi eng emaw zat chu an in lamah an haw tawh bawk.

ZALEN-in transit camp enkawltute hnen atanga thu a dawn danin Manipur atanga raltlan lutte hi a tlangpuiin Lamka leh a chhehvelte an ni tih an sawi a. Heng raltlante hi veng hrang hrang - Vaivakawn, Chanmari, Mission Veng, Mission Vengthlang, Hlimen, Tuikhuahtlang, Armed, Electric Veng leh Kulikawn vengah te an semdarh leh thin an ni.

Transit camp enkawltute chuan raltlan lut zinga thenkhat chu phai lama lehkha zir chhunzawm turin an kal niin an sawi a, hei bakah hian Manipur sawrkarin class IX chin chung lamte sikul luh tur tia hriattirna a chhuah avangin haw chho an awm nual tih an sawi bawk.

Mizorama Manipur raltlante hi Central YMA chuan an remchan dan angin an hnathawh tur an zawnsak thin a, thenkhat chu mi awmpuiah tangin mi huan enkawltu leh ni tin inhlawhnate an zawnsak bawk.