ZALEN, Aug. 11, 2026: LBS Suzuki Avenis 24th Inter Branch YMA Volleyball Tournament 2026 final-ah set hnih an lak hnuah champion lai, Bungkawn Branch talbuai zui mah se a tawpah Dawrpui Vengthar Branch hnehin an nomawi kawl lai an humhim.

R.Dengthuama Hall, Mualpui, Aizawla Nilaini zan final-ah champion lai hian harsa lutuk lovin nomawi an la leh thei mai dawn emaw tih turin set thumna laihawl thlengin an khel a; mahse, tun lai spiker chawr chhuak thar tha ber pawl, Remlalnghaki leh Best Player-a thlan zui, Lalramliani hovin Dawrpui Vengthar an insangmar a, set hnih la zawnin 2-2-in an pawt thla.

Deciding set-ah erawh Bungkawn nulate an talbuai zui duh tawh lo va, a tawpah 3-2 (25-21, 25-20, 22-25, 12-25, 15-5)-a chakin a vawi kua nan an champion.

Bungkawn hian tha taka bul tanin Player of the Match-a thlan, F.Lalparmawii hovin hma an hruai ngar ngar a, a tawp lamah talbuai zeuhvin 21-21-in umphaktir mah se point hloh zui tawh lovin set an la.

Set hnihnaah pawh 4-0-in hma an hruai lehnghal a; mahse, Dawrpui Vengthar insiam thain an pawh thla a, 15-9-in hma an hruai let zui a. Champion lai insang phek tha lehin an chesual zui duh ta lo va, 17-17-a nihrual hnuah dan theih lovin set an la zui leh.

Awlsam takin Bungkawn an champion zui mai dawn emaw tih turin set thumnaah 12-2 zetin hma an hruai zui a; mahse, Remremi leh Rami ten invuak tlak chhawkin an lama ball tla tur an la thei zel bawk a, 14-14-a umphkin tlahniam zui lovin set an la zui.

Set linaah 6-6 thleng inum mah se Dawrpui Vengthar nulate bawk kal fal zuiin lehlamin point 12 chauh an hmu hman tihin set an la a, 2-2 a ni.

Deciding set-ah erawh champion lai insiam remin 4-1-in hma an hruai nghal a, tlakhniam zui nei tawh lovin 15-6-a set lain inelna vawi 22 buatsaih tawha champion ngun ber an nihna an belhchhah zui.

Kar kal ta Thawhlehni atanga khelh tan inelnaah hian hmeichhe team 19 an inlan a. Bungkawn hian Hlimen, Ainawn leh Dinthar Branch hnehin final an lut a, final hma zawng hian set hloh an nei miah lo.

Ningani zan hian mipa final khelh a ni dawn a, Khawbel Branch leh champion fo tawh, Hunthar Branch an inkhel ang.

HMEICHHE FINAL RESULT:

Bungkawn Br bt. Dawrpui Vengthar Br

3-2 (25-21, 25-20, 22-25, 12-25, 15-5)

Player of the match - F. Lalparmawii, Bungkawn

MI MAL LAWMMAN:

Best Player: Lalramliani, Dawrpui Vengthar

Best Setter: Lalropuii, Dawrpui Vengthar

MIPA FINAL (Aug. 13, 2026 - 8:00 PM)

Khawbel Branch vs Hunthar Branch