ZALEN, Aug. 09, 2026: LBS Suzuki Avenis 24th Inter Branch YMA Volleyball Tournament 2024 khelh mekah mipa team riat leh hmeichhia pali chiah an dam ta a. Mipa quarterfinal hi Thawhtanni hian khelin Thawhlehniah semifinal khelh a ni ang.

Mipa quarterfinal-ah hian champion lai, Muanna Veng Branch chuan khelh hmasak bera an awl hnuah Thanglailung Branch chu 3-0 (25-23, 25-18, 25-12)-in an hneh a. Inrinni khan Lungdai Branch chu 3-0 (25-1, 25-14, 25-17)-a hneh lehin a thiam pariat zingah an tel.

Quarterfinal-ah Aizawl pawn lam branch pathum la dam zinga pakhat, Tachhip Branch an tum dawn a. Anni hi Mizorama volleyball inelna sang ber, Pro Volleyball League-a team nei thei veng, Electric Veng Branch laka 3-1-a hnehna chang thei an ni.

Aizawl pawn branch hnih intum turah Khawbel Branch-in Ngopa Hmar Veng Branch an su dawn a. Branch khata Pro Volleyball League player kawl tam ber pawl, Khawbel hian khelh hmasak ber an awl hnuah Rabung Vengthlang Branch chu an thiampuipa, Johan Vanneihsanga tel lo chungin 3-0 (2515, 25-16, 25-22)-in an hneh a. Inrinni khan Johan-a hovin Sihphir Branch chu 3-1 (25-22, 25-15, 24-26, 26-24)-a hnehna changin quarterfinal an lut.

Ngopa Hmar Veng hi khelh khatna an awl hnuah Sihphir Venghlun Branch lakah 3-0 (25-20, 25-15, 25-21)-a hnehna changin Inrinni khan Bungtlang Chhim Veng Branch lakah 3-0 (25-15, 25-17, 25-19) bawka chakin quartefinal an lut.

Pro Volleyball League club, Tuichangral hmunpui, Khawhai Branch-in semifinal luh inchuhin Nursery Veng Branch nen an insu dawn a. Mizo spiker tha pahnih, Zomuansanga leh Saidingpuia Sailo kawltu, Khawhai hi an khelh hmasak bera an awl hnuah Bethlehem Vengthlang Branch lakah 3-0 (25-18, 25-20, 25-21)-a chakin Inrinni khan Dengsur Branch laka set hmasa ber hloh mah se 3-1 (22-25, 25-19, 25-16, 25-17)-in hnehna an chang leh a, a thiam pariat zingah an tel.

Nursery hian Chungtlang Branch lakah 3-0 (25-12, 25-17, 25-8), Buarpui Branch lakah 3-0 (25-16, 25-9, 25-19) leh Inrinni khan Dinthar Branch lakah 3-0 (25-14, 25-15, 25-21)-a hnehna chang tawhin quarterfinal an lut.

Mizorama volleyball hmunpui tling, lo champion fo tawh, Hunthar Branch leh tun hma lama thiam thin veng, Maubawk Branch-in semifinal lut an inchuh dawn bawk.

Pro Volleyball League Mizo Best Player ni lai leh Best Setter vawi tam lo ni tawh, Remsangzuala (Lalmama) hova thawk chhuak, Hunthar hi khelh hmasak bera an awl hnuah Tualcheng Branch lakah 3-0 (25-4, 25-21, 25-11) leh Inrinni khan Hmuntha Branch lakah 3-0 (25-17, 25-21, 25-22)-a hnehna changin quarfinal an lut.

Mizo setter tha ber pawl, C.Zonunmawia (C-tea) telna, Maubawk hi khelh hmasak bera an awl hnuah Bawktlang Branch lakah 3-0 (25-10, 25-13, 25-20)-a hnehna changin Inrinni khan Kulikawn West Branch laka set hmasa pahnih an hloh hnuah tho lehin 3-2 (17 -25, 24-26, 25-19, 25-12, 15-2)-in an chak a, a thiam pariat zingah an tel.

Central YMA leh Mizoram Volleyball Association (MVA) buatsaih inelna hi Thawhlehni atang khan R.Dengthuama Hall, Mualpui, Aizawlah khelh niin Inrinni hian khelh zawh tura ruahman a ni.

THAWHTANNI (Aug. 10, 2025) INKHEL TUR:

Mipa quarterfinals (10:00 AM):

Muanna Veng Br Vs Tachhip Br 

Ngopa Hmar Veng Br Vs Khawbel Br 

Khawhai Br Vs Nursery Veng Br

Hunthar Br Vs Maubawk Br

THAWHLEHNI (Aug. 11, 2025) INKHEL TUR:

Mipa semifinals:

Hmeichhe semifinals:

Bungkawn Br Vs Dinthar Br

Luangmual Br Vs Dawrpui Vengthar Br