YMA VOLLEYBALL: Harsa taka Tachhip hnehin champion lai, Muanna Vengin semifinal lut

ZALEN, Aug. 11, 2026: LBS Suzuki Avenis 24th Inter Branch YMA Volleyball Tournament 2026 khelh mekah champion lai, Muanna Veng Branch-in harsa taka Tachhip Branch hnehin semifinal an lut a, Khawbel Branch an hmachhawn zui dawn.

Thawhtannia quarterfinal-ah Aizawl daia branch lian bik lo tak, Tachhipin chanchin duhawm ziah belh zel tumna nei chungin champion lai an hmachhawn a. Player of the Match atana thlan, Samuel Lalpekhlua hova tha taka beiin set hmasa ber pawh lain a hnuah 2-1-in hma an hruai hman bawk.

A tawpkhawkah erawh Muanna Vengin tawnhriat nei tha an nihna tilangin hnufual zawk an nih lai pawhin an tho leh zel a, a tawpah 3-2 (23-25, 25-23, 20-25, 25-22, 15-13)-a hnehna changin an nomawi kawl lai humhim turin remchang an la nei.

Muanna Veng hmaa ding tur, Khawbelin anmahni ang bawka Aizawl pawn lam branch, Ngopa Hmar Veng chu 3-1 (26-24, 28-26, 23-25, 25-16)-a hnehin semifinal an lut a. Khawvel tan middle blocker Lalremfela’n langsar taka khelin Player of the Match-ah phu taka thlan a ni a, an thiampuipa, Johan Vanneihsanga pawhin vaw tla thei bik a nihna a tilang thei zel bawk.

Tun hmaa volleyball thiam veng ni thin, tun hnaia langsar lutuk ta lo, Nursery Veng Branch-in tun laia a thiam ber pawl khua, Khawhai Branch hnehin semifinal an lut a. Mizoram khawchhak lam branch hian tun lai Mizo spiker tha pahnih, Saidingpuia Sailo leh Zomuansanga kawl mah se Lalvenpuia hova thawk chhuak Nursery an su tlang zo lo va, 3-0 (25-18, 25-18, 25-19)-in an tlawm.

Vawi thum champion tawh, Hunthar Branch-in 3-0 (25-16, 25-23, 25-13)-a Maubawk Branch hnehin final luh inchuhin Nursery an su zui ang.

Hunthar atan player tawnhriat nei tha, Lalruatfela Sailo chuan thalai zawkte zingah pawh theihna a la nei a ni tih lantirin phu takin Player of the Match lawmman a dawng a. Amah thlawptu, Pro Volleyball League-a Mizo Best Player ni lai, Best Setter ni fo tawh, Remsangzuala’n a khelhna thina khel lovin thlawp tha tawk chiah lo mah se Maubawk tan dan hneh theih an ni lo.

YMA Volleyball inelna hi R.Dengthuama Hall, Mualpui, Aizawlah khelh mek niin semifinal hi Thawhlehni hian khelh a ni dawn a, hmeichhiain khel hmasain mipain an khel zui ang.

MIPA QUARTERFINAL RESULT:

Muanna Veng Br bt. Tachhip Br (3-2)

23-25, 25-23, 20-25, 25-22, 15-13

Player of the Match - Samuel Lalpekhlua, Tachhip

Khawbel Br bt. Ngopa Hmar Veng Br (3-1)

26-24, 28-26, 23-25, 25-16

Player of the Match - Lalremfela, Khawbel

Nursery Veng Br bt. Khawhai Br (3-0)

25-18, 25-18, 25-19

Player of the Match - Lalvenpuia, Nursery Veng

Hunthar Br bt. Maubawk Br (3-0)

25-16, 25-23, 25-13