ZALEN, Aug. 14, 2026: Vaw tla thei fal bik awm lo mah se lehlam vuak la thei tak, Hunthar Branch-in Khawbel Branch hnehin LBS Suzuki Avenis 24th Inter Branch YMA Volleyball Tournament 2026 mipa final-ah 3-1-a hnehin a vawi li nan an champion.

Ningani zana R.Dengthuama Indoor Stadium, Mualpui, Aizawla final khelhah set hnihna leh lina tawp lam ve ve-ah rei vak lo an talbuai zeuh tih loh chu tha mar taka khel tluanin 3-1 (25-21, 23-25, 25-23, 25-18)-a hnehna changin YMA branch inelna bikah champion ngun ber an ni ta.

Set hmasa berah tun laia volleyball thiam khaw lar, Khawbelin Johan Vanneihsanga hova bul tan tha zawkin 12-8-in hma an hruai hman a. Mahse, inelna sang leh boruak khirh tak kara vawi tam lo khel tawh, Hunthar insiam rem hret hretin 16-16-a an nihrual hnuah hnungtawlh tawh lovin set an la.

Set hnihnaah pawh bul tha zuiin point hmasa pathum an hmu zawn a; mahse, Player of the Match-a thlan, Johan-a'n Khawbel tan a hma atang leh a hnung atanga vaw tla zelin 10-10-a an nihrual hnuah an tlansan zui a, an tlansan tluan.

Set thumnaah Hunthar bawkin bul tan tha zawkin 21-16 hialin hma an hruai hman a; mahse, Khawbel insawrbing tha lehin lehlam vuak dan kawngah an insangmar a, set point-ah umphakin vawi li an deuce hnuah chakna remchang nei zui mah se Johan-a'n a vaw kai lo va, lehlamin vawi hnih tidik zawnin set an la leh a, 2-1-in hma an hruai.

Set lina tan phat atangin Khawbelin an insawrbingna an hloh va, 16-7 laiin an hnufual hman a; mahse, an um chho hret hret a, Hunthar hian point khat chiah champion nan an mamawh tawh laiin Khawbelin a zawna vawi ruk tidik zawnin 22-24 hialin an hnaih leh hman a. A tawpah erawh an tang tluan zo ta lo va, a vawi khat nana champion an tumna an tihlawhtling zo ta lo.

Tun tum inelnaah hian Best Player atana thlan, opposite hitter Laldampuia Chhangte chu Hunthar tan mi mala langsar a nih rualin captain, a khelhna thin pangngai (setter)-a khel lova outside hitter-a chhawr, Remsangzuala (Lalmama) leh Lalruatfela Sailo te tawnhriat neih an chhawr a tih theih a, hun pawimawhah an tangkai thin hle.

Hunthar hi YMA volleyball mipa inelna vawi 17 khelh tawhah Maubawk nen vawi thum (2005, 2009 leh 2022) champion tawhin nomawi la ngun ber an ni dun thin a, tunah erawh an kal fal ta a ni.

Kumin inelna hi kar kal ta Thawhlehni atanga khelh tan kha niin mipaah hian branch 57 telin hmeichhiaah 19 an tel thung a. Nilaini zan khan Bungkawn Branch-in 3-2-a Dawrpui Vengthar Branch hnehin an nomawi kawl lai an lo humhim tawh a ni.

MIPA FINAL RESULT:

Hunthar Br bt. Khawbel Br

3-1 (25-23, 20-25, 29-27, 25-22)

Player of the Match - Johan Vanneihsanga, Khawbel Branch

MI MAL LAWMMAN:

Best Setter - Francis Lalhmingthanga, Hunthar Branch

Best Player - Laldampuia Chhangte, Hunthar Branch