DOWNLOAD OUR APP

Read latest news on your phone
app-store
Yoga: A hlauhawm em ni?
Jul 30, 2016
- Dr. Rohmingmawii Mizote hi dawihzep leh hlauh ngah tak niin sawi a awm thin. Khawchhak lung lum thenkhatin kan hlau a, a thenin UID kan hlau bawk a, sakawlh hlau kan awm bawk a. Chutih laiin hlauhawm dang, thim thuah hnih (thuah thum zawk em ni?) leh China ral liante thenkhatin an lo sawi mek bawk a; tunah yoga chungchangah inralrinna thu sawi a awm leh a, intihthaih reng mai anga ngai duh tan chuan a ngaih theih mai thei. Mahse kohhran hruaitute pawhin an buaipui tak avang hian Kristiante tan chuan hlauhawm satliah dang nen chuan a inang lo a ni ngei ang. Yoga a hlauhawm em ni? Krista bosan hlau lo tan chuan yoga hian hlauhawmna a nei vak lo. Hindu culture-a luh hlauh loh phei chuan yoga chu hlauhawm lo tak a ni. Yoga-in a ken tel thil pahnih, Hindu culture leh Kristiante Pathian ni lo pathian dang thu a hril telte avang hian Kristiante tan chuan a him lo tih a ni mai a. (Hindu sakhua leh an culture hi then hran theih a ni si lo a). Khawthlang rama Hindu rindan an pawm nasatzia leh International Yoga Day hmang tur pawha hmin an awlsamzia ngaihtuah hian yoga thiltiththeihna chu a langchiang mai awm e. Mi pakhatin min hrilh chu, a hmelhriat pakhat thian, Kristian chu Delhi-ah yoga a ti thin a, zawi zawiin inkhawm a thlahthlam a, a lo rei hnu phei chuan a /hi awrhah Baba leh tu tu emaw thla a awm tan a, Kristianna a hlat tial tial mai a ni tih a sawi. Yoga tih uar atanga devotion hmang thei ta lo Mizoram ngei ami an sawi pawh ka hria. Heng hi engtinge a lo awm theih? Meditation, yoga ti yoga-tu ber pawh Kristianin kan nei ve tho a, engati nge yoga hi kan tih-Kristian mai loh? tih zawhna mi tam takin kan zawt a. Pastor pension tawh ngei pawhin, “Om Shanti’ aiah ‘Aw Isu’ ti ila, ‘Krishna aiah Krista, Ganesh aia Tlantu” tiin a rawn rawt anih kha. Mahse, ka’n ti teh ang, Yoga thlaraumi na (spirituality) leh Kristian thlaraumi na hi thil hrang hlak a ni a, a tum (focus leh goal) pawh inpersan tak a ni a, sawi kawp theih a ni lo. Yoga chuan mahni (self) hi tundin a tum ngar ngar a ni a, chu chu Krista Kros-in tihhlum a tum ngar ngar kha a ni. Yoga meditation-in a tum pawh mahni ‘pathianna’ inhriatchhuah a ni. (‘Self-realisation’ (mahni inhriatchhuah) a yoga-in a tum ber chu keimahni kha ‘pathian’ kan lo ni reng tih hriatchhuah a ni a, Kristian self-realisation ah chuan Pathian tel lovin engmah kan ni lo tih hriatchhuah a ni). A meditation hrim hrim pawh hi a thumal hman (‘meditation’ tih thumal) bak hi a inang lo. Yoga meditation-ah chuan ‘rilru bun ruah’ a ni a, Kristian meditation ah chuan Pathian thua ‘rilru tih khah’ a ni. Yoga leh Kristianna hi inang hmel deuh si, mahse a tum leh a tawpna chu inhlat em em si a ni. ‘Christian yoga’ tia kan sawi fo hi, an yoga step leh kalphung zulzuia tih ve tho tumna rilru nena sawi kan nih chuan, a tawpa min thlenpui tur hi Isua Krista ni lovin ‘Krishna’ a ni ang. A chhan chu, yoga chu “Krishna hriatna tura rahbi” (stepping stones to Krishna consciousness) a ni miau a. Yoga tih paha Isua hming lo lam hi ‘Lalpa, Lalpa’ mi ti nazawng...” a tihte zinga telna kawng a ni maithei! Kros hmang chuan Isua hnen chauh kan thleng ang hian, yoga hmang hian Krishna/brahman hnen chauh a thlen theih a ni. Isuan amah thlen theihna tura ‘kawng’ tia min zirtir kha a ni miau lo a ni. Mizote chauhin em ni Yoga hi hlau le? Yoga chungchangah hi chuan Mizote chauh ni lo, khawvel Kristian kal fimkhur deuh (pluralist (pawmzam) Kristian ni lo) ho chuan zawhna an lo chawpchhuak vek a, inhnialna (debate) pawh a tam hle mai. Han google ila, “Does doing yoga make you a Hindu?”, “Yoga- Just Exercise or a Hindu Religion?” tihte, “Health – Should Christians Do Yoga?” etc. a lo lang nghal chuai chuai mai ang. USA-ah pawh an school-a naupangte yoga practice-tir an nih khan nu leh pa thenkhatte chuan an complaint a. Kristian pawl pakhat, National Centre for Law & Policy (NCLP) chuan hma la zuiin Court-ah an kalpui a, San Diego County Superior Court chuan yoga posture-a vai hmingte naupang hriatthiam zawng, “kangaroo”, “surfer” “criss-cross apple sauce” titea a lo thlak tawh avangin naupangte tan a hlauhawm loh tiin a hnawl a, NCLP chu lungawi lovin an la appeal zui zel a ni. Khawthlang rama Kristiante mai ni lo, Yoga neitu ‘vai’ kan tihte zing ami, Hindu atanga Kristiana rawn piangtharte hlei hlei hian a thatlohna hi an tlangaupui nasain an duh lo a, internet hmang thiam thalaite chuan google leh youtube ah kan hmu teuh thei ang. Chutih laia keinin kan rizai lo zawn tum talh hi thiltha a ni dawn em ni? Kohhran hruaitute’n kohhrante yoga laka fimkhur tura an chah hi yoga an hlauh tehchiam vang emaw, yoga leh Hinduism an do anga ngaih pawh hi a dik kim lo mai thei. An tapchhak zawla sakhaw rin dan hrangin a rawn luhchilha rawn barhluih a tum chuan a mi leh sate lo venhim tum chu a tihtur dik tak a ni lawm ni? Engmah lo ti lo ta se kan dem nasa zawk viau lo’ng maw? A nihna takah chuan, yoga hian kan tapchhak zawlah min luhchilh a, chuti chung chuan hlauh leh dodal nachang kan la hre lo viau zawk a nia. Hlauh tur hlauh nachang hriat hi tawngpawng at huai nen a enge thlan tur zawk ni ang? Fimkhur tura inhrilh avanga Mizote ‘hlauh ngah hnam’ ang hiala inchhuah hi a dik meuh dawn em ni? Yoga Kristiante tan a him leh him loh kan zawh vak vak rual hian a lehlam zawngin, engvangin nge Hindu-te hian yoga heti tak maia thehdarha min barhluih hial an tum? tihte hi inzawtin chhan i tum ve bawk ang u hmiang. A phena awm hriatchhuah turte a lo awm mahna. Yoga hi thlarau lam thil, thlarau nun khawih a nih avangin, tun damchhung chauh ni lo, thih hnu khawvel beiseitute tan chuan holam taka pawmzam mai mai chi a ni lo ve.
MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh