ZALEN December 4, 2024 :Mipui atanga ngenna an dawn tihlawhtling turin LPS Youth Icon Top 10-te Lammuala concert nei turin ngawrh takin an inbuatsaih mek a, zanin atangin online-in ticket a lei theih tan e.

December 14, 2024 zanah Icon Top 10 Concert neih a ni dawn a, Lammual luh man Rs. 500 leh Rs. 1,000 ni tura ruahman niin online-a zawrh chhuah tan a ni a, bookmaster.in-ah lei theih a ni.

Concert hi Youth Icon judge zinga mi, Mizo top singer Rosy K. Remsangpuii leh a thiante buatsaih tur a ni a. Icon star-te hi zai mai ni lo, musical instrument lam pawh khawih thiam tak takte an ni a, an zai thenkhatte chu anmahni inrem tura ruahman a ni nghe nghe.

Youth Icon Top 10 Concert-ah hian ticket Rs. 1,000 man leitute chu a hma lama awm tura ruahman niin, Icon star-te pawh selfie-pui thei tura ruahman a nih thu a buaipuitute chuan an sawi.

Icon Top 10-te a huhoa an inlanna tur concert buatsaih tura ngenna mipui atanga an dawn nasat em avanga concert hi buatsaih an nih thu a buaipuitute chuan an sawi a, Icon star ngainatute chu ticket leisak theuh turin an sawm a ni.