Kum 10 liam ta khan ‘Never Say Never’ music video an tichhuak a, tunah chuan he video hi mi tluklehdingawn khat chuang zetin an en tawh a ‘YouTube Billion Views Club’-ah an inhlangkai.  

Kha tih lai khan Justin Bieber hi kum 16 mi chauh a la ni a, a zaipui Jaden Smith phei chu kum 11 mi lek a ni. Canadian singer Justin Bieber tan chuan tun hi YouTube-a billion views kai pha hla pariat a neihna a ni der tawh a, record ropui tak a ni. A hla zingah - Sorry (3.4 billion), Baby (2.4 billion) leh What Do You Mean (2.1 billion) te chu entu ngah zual an ni.

‘Never Say Never’ music video hi May 28, 2010 khan YouTube-ah upload niin, nimin thleng khan mi 1,001,294,993 zetin an view tawh bawk. 

Tun hnai khan JB hian a album thar tur ‘Justice’ atangin single eng emaw zat a tichhuak leh tawh a, ngaihven a hlawh nghal hle. Zaithiam lar tak tak - Lil Uzi Vert, Jaden Smith, Quavo, DaBaby leh Tori Kelly te a thawhpui bawk avangin ngaihven a hlawh zual a, a hla te hi a rawn lar chho leh hlawm viau a nih pawhin a mak lo vang.