Aizawl September 2, 2024 : Minister hlui Lalchamliana chuan, "Vawiinah hian thuthlung hlui a kir leh a hun a ni, Bible pawh hi thuthlung hlui tel lovin a kim lo a ni, kan hnam chanchin hmanlai changta te hriatchian a tul a, tunlai chanchin chauh chawivawng hi a famkimlo a ni," a ti a, zalenna sualtute tel lovin MNF leh Mizo hnam history a tel lo niin a sawi.

MNF Hnam Run chhung inkhawmna leh Lalrokhawma ziah "Saizahawla Batallion" a tlangzarhnaah Chama chuan, Zalenna sual tute tel lovin MNF hi a kim lova, Mizo hnam history pawh hi a kim lo a ni, lehkhabu rotling buatsaih a ni chu lawmawm a tih thu leh lehkhabu buatsaihtute thawhrimna fakawm a tih thu a sawi bawk. 'S' Batallion member 70 martar-te pual hian minute khat ngawi renga dingin zahna lantirna neih a ni.

Lekha bu tlangzarh thlirlawkna neitu, MNF Gen. Secretary Er, K. Lalsawmvela chuan, 'Mizoram freedom movement' hi lehkhabu hrang hrang ziak a awm tawh thu sawiin, fimkhur a ngaih thu leh, hnam history tur a ni tih hriat a tul thu a sawi a. Mithenkhat 'Tai' nei rán a thu ziak an awm bawk thu sawiin, "Saizahawla Batallion" lehkhabu Lalrokhawma ziah erawh hi chu thangthar lo la awm zel tur tan lehkhabu hlu tak a ni ngei ang, a ti.

Lehkhabu ziaktu Lalrokhawma chuan, vanglai hun tha, tha leh zung ram tana hlan a hliampui tuar leh martar-te chanchin ziah chhan sawiin, "Zalenna sual tute mual an liam zel avang leh ziak a thu dah chu thangthar te tan a pawimawh em em a, hmanhmawh a tulna chuan a bukthlu a ni," a ti. Zalenna sual hi Mizo history a hmun lailum chang reng tawh tur a ni, a ti bawk.