Aizawl: Nimin zing khawvar hma, dar 3 bawr vel khan Zamuang leh Zawlnuam inkar, Putar lui bulah mi thahnemngai duty-ten Myanmar kuhva ro thahnem tak an man a, kuhva ro leh a phurhna lirthei pangate chu kangin, driver-te erawh an insaseng hman avangin an him nia hriat a ni.

ZALEN thudawn danin Hachhek bial kaltlanga dan loa Myanmar kuhva ro phurh veng turin mi thahnemngaite an duty thin a, nimin zinga kuhva an mante hi a phurtu driver, Mizo vek nia hriatte an tlanbo avangin khawi atanga phurh nge tih chiang taka hriat theih a ni lo.

Driver-te hian kuhvate hi Kanhmun thlenpui a, chuta tanga Assam-a phurh luh an tum nia rin a ni.

Myanmar kuhva ro an manna lirtheiah hian Myanmar product cigarette leh bungraw hrang hrang phurh tel a ni a, motor atanga kuhva rote an hlan thlak fel hnuah, mipui thahnem tak an pungkhawm nghal bawk.

Mipui an punkhawm tam hmain driver-te erawh an bibo hman a, he thu ziahlai thleng hian an chinchang hriat zui an la ni rih lo. 

Thil thleng chungchangah hian police-ten thil awm dan an chhui nghal nia hriat niin, Hachhek bial chhungah hian Hachhek Bial Kuhva Chingtu Pawl (HBKCP) angin duty kalpui a ni lo a, thahnemngai zualte an duty thin nia thudawn a ni.

He thil thlengah hian ZPM Hachhek West Block chuan thuchhuah siamin, sawrkarin dan leh thupek kenkawh kawnga a hlawhchhamzia inhriatchhuah nan hmang se an duh tih tar langin, mipui dinhmun thlirin Hachhek biala kuhva rah hralhna chu thil hmanhmawhthlak tak a ni tawh tih an tar lang.

November 17, 2022 khan Mamit DC chuan Mamit district chhung khawi hmunah mah dan ang ni lova kuhva rah lakluh, kawl leh phurh khap tlat a ni tih thupek a lo tichhuak tawh.