Mizo Film Award 2021-a Best Actor award latu Papuia Pachuau leh Miss Mizoram 2017 finalist Esther Sailo te channa 'Driver Kima' chu zanin hian tlangzarh a ni dawn ta. He film hi In-House production kutchhuak film puitling pahnihna tur a ni dawn a, a hma khan ‘Ka Bialnu’ an lo tichhuak tawh bawk. 

Miss Mizoram atanga mipuiin kan hmelhriat Esther Sailo chu a changtunu tur a ni dawn a, Papuia nena an changdun tur hi en chakawm tawh tak a ni - Lil Toto leh Awmpuipa a la awm cheu bawk! A script hi Samuel L. Pachuau ziah a ni a, a genre pawh sawi thiam harsa tak a ni. Comedy, love story leh crime te pawh a kim viau a ni awm e - en chakawm tawh tak a ni. 

An director Drew Pachuau chuan, “Boring awm miah lo tura siam a ni a, en man a awm ang,” tiin a lo sawi tawh a, beisei a nei sang hle tih a hriatthiam theih mai awm e. Movie premier hi Hyve, Aizawl City Hall-ah neih a ni dawn a, In House Production YouTube channel-ah live a ni ang a, zan dar 8:00pm atangin a film hi Lersia Play lamah en theih a awm bawk ang.