ZALEN, August 20, 2025: Nilaini zana Vana Pa Hall-a ‘Zamzami Pa’ movie tlangzarhnaa kalte zing mi vannei hnenah TV pek a ni dawn!

Osiama Pictures Production kutchhuak movie thar hi zan dar 08:00-ah tlangzarh a ni dawn a. Tlangzarh hnuah hian Runmawi App-ah lei theih a ni zui ang.

Tlangzarh zanah hian a hmunah ticket Rs. 100 man lei theihin a awm dawn a, ticket leitu zinga mi vannei hnenah Ahmai Store, Home Appliances, Durtlang Leitan, Aizawl chuan TV (32 inches) an pe dawn a ni.

J&R Business leh Runmawi App te tangkawpin an produce tur movie thawnthu hi Mizo khawtlang nun nena inmil tur tak a ni a. Tlangval pahnih, khawvel mi ve takten an tawn tura an la suangtuah ngai loh thilin dengin fa la nei chhin miah lo kha zan khat thil thu-ah pa an ni thut a ni. 

‘Zamzami Pa’ movie hian nu leh pa mawhphurna leh an hlutzia a tar lang a. Sulhnu tha tak tak nei tawh Gospela Tlau leh Joe Pachuau ten nu tel lova fa pawm hautakzia an lantir thiam a, hmelthat vanga hmeichhe naupang duh rawn, Didiki Pachuau a inlan dawn bawk.

#zalennews