Aizawl December 18, 2023 : Vawiin khan Vanapa Hall, Aizawl-ah Manipur atangin Zawlnei Ngaikholam Tauthang kum 94 mi chu Aizawlah a rawn kal a, Zo Reunification Organisation (ZORO) hruaitute hnenah a lo hmuh lawk angin Dar bel a rawn hlan.

Zawlnei Ngaikholam Tauthang chuan, "Mizoram kan rawn kal chhan chu Covid hrilen hma daih tawh khan Zofate inkarah inremna a awm theih loh avangin ral a awm dawn thu hi Pathian atangin ka dawng tawh a, ka lo hmuh lawk ang ngeiin May ni 3, 2023 khan Zofate leh Meitei inkarah buaina nasa tak a rawn thleng ta a, he buaina hi nidanga kan buaina thin ang a ni ta lova, hei ngei hi Pathian min hmuh tir kha a ni kan ti ta a. Manipur Zofate hi kan inthurual lo hle a, Pathian hi kan tlansan nasa tawh a. Pathianin Zofate ram min pek hi a duh tawh a ni. Tun atanga in tanrual chuan induhthlan ram hi in hmu ang, heti chunga Pathian thu awi lova in awm chuan tun aia nasa in harsatna in tawk ang Pathianin a ti a ni," a ti.

Ngaikholam Tauthang chuan, "Zofate hi Manipur, Burma (Chin), India, Bangladesh khawi hmun a mi pawh kan insuihkhawm a, inpumkhat leh in hmangaih hun a lo thleng ta a ni. Pathian min hmuh tir danin Aizawlah in kal anga Dar bel hlanna tur chu Pathian hnen atangin a rawn thleng mai ang a, Vanapa hall ngeiah Pathianin Dar bel inhlan anga min ti a. ZORO hi Zofa khawvel hmun hrang hranga awm huapzo pawl a ni a, ZORO a hlan turin min ti a ni. Zofate hi Pathianin min awmpui anga rorelna pakhat hnuaiah kan la awm dawn a ni." a ti bawk.

Vawiin Vanapa Hall Dar bel inhlannaah hian ZORO hruaituten an lo dawngsawng a, Ngaikholam Tauthang hi Manipur atangin a pasal leh a chhung khat laina leh thiantha thahnem takin an rawn tawiawm a ni. 'Insuihkhawm leh zai i rel ang u' tih hla sak ho a niin, Hnam lam Cheraw entir a ni bawk a ni. Ngaikholam Tauthang leh Dr. Chinkholal Tauthang ten ZORO hmalak zelna turin pawisa ZORO hruaitute hnenah an hlan bawk a ni.