ZALEN, September 21, 2025: Inrinni chawhnu khân School Education Minister, Dr. Vanlalthlana chuan, Zirsangkima lehkhabu thar ber, ‘puanzàr phèn’ a tlangzarh.

School Education Directorate Conference Hall-a lehkhabu tlangzarh inkhawm hi Vanlalrema Vantawl, Editor, ZALEN chuan kaihruaiin, lehkhabu thlirlawkna hun hi Lalvansanga Pautu, Desk Editor, The Zozam Times chuan a nei thung.

Lehkhabu thlirlawkna hmangtu, Vansanga chuan ‘puanzàr phèn’ hi zirlai, nu leh pa, zirtirtute, Pathian thuhriltute zawng zawng bakah entertainer te thlenga chhiar chi leh hriat ngei ngei chi awmna nia a hriat thu a sawi a. A changa fuihna, a changa tumruhna pe thei thuziak awmna nia a hriat thu sawiin, Zira lehkhabu pangana hi lei a, chhiar a, nunpui chi nia a hriat thu leh, vawi tam chhiar chi, Mizote mamawh awmna a nih thu a sawi.

ZALEN leh ni tin chanchinbu The Zozam Times columnist — ‘ramada 19,’ ‘2,’ ‘2 … but III’ te leh ‘Reh ri’ tih lehkhabute lo ti chhuak tawhtu, Zirsangkima lehkhabu thar hi, a lehkhabu hmasate ang lo takin thawnthu awm lohna (non fiction) a ni a. Mi lâr — zai thiam, lem chan thiam, infiam mi, ziaktu, sumdawng leh zirna kawnga mi hlawhtlingte chanchin… mi nazawngin, ‘an puanzàr phèn nun’ kan hriat loh a chuang a. Hei bâkah hian Mizo zinga mi chhuanawm leh fakhlawhho nun langsâr lo lai a ziak tel bawk.

‘puanzàr phèn’ lehkhabu hi Rs 300/- man a ni a. Lehkhabu dawr hrang hrangah ngaihven theih a ni.