Aizawl: Nimin khan MZP Conference Hall-ah Lengteng bial chhung leh Sialkal Range Development Council (SRDC) area huamchhunga zirlai thiam thei, First Division leh a chunglam pass, chhungkaw harsa thlanchhuah zirlai 38 te hnenah tanpuina sum a hlan.

Lengteng bialtu MLA leh SRDC Chairman Dr. L.Thangmawia chuan he hunah hian thu sawiin, chhungkaw harsa tak atanga lehkha zir a nih thin thu te, retheihna hi zirna hlawhchham phah nana chhuanlam tling lo a nih loh thu leh kan lehkhathiam hmasa chhuanawm tak tak te kha retheihna hneha hlawhtlinna chang an ni deuh vek a ni, a ti.

Dr. L. Thangmawia chuan kum 2018 khan Assembly Committee pawimawh tak General Purpose Committee, Speaker kaihhruai, Chief Minister pawh a telna chuan MLA Fund hman theihna pakhat “GIA to Educational Insitutions” tih thin chu “GIA to Education” ti a thlak turin thutlukna a siam a. Chuvangin zirna in (Institution) chauha MLA Fund hman theih thin kha zau zawkin zirna lamah a hman theih ta niin a sawi.

Lengteng bial MLA Fund pawh zirna lam atan hman a nih thu sawiin Human Resources Development Board Vice Chairman ni bawk chuan, "A changin zirtirtu indaih loh rawih nan te, IAS nih tum puih nan te, sikul mamawh Computer leh Cooler lei nan te, Sikul te Sports a an tel theihna atan te, sikul building sak nan te leh zirlai harsa tanpui nante, bialchhunga zirlai pawl hrang hrang tanpui nan te tangkai takin kan hmang chho mek zel a, a vaia kan hman hi cheng nuaih tam tak a ni tawh," a ti. MLA Fund nasa taka zirna lama hman a nih theihna chhan chu Lengteng bial mipuite vang a nih thu sawiin an chungah lawmthu a sawi a ni.

MLA Fund atanga zirlai tanpuina hi BDO, Ngopa Chairman-na hnuaiah a thlang tur committee awmin First Division-a pass chin, chhungkaw harsa atanga thlan an ni a. Kum 2019 khan zirlai 13 tan Rs 2,10,000, kum 2020 khan zirlai 18 tan Rs 2,50,000 sem a lo ni tawh a. Hripui leng avangin kum 2021 khan sem a ni lo va. Kumin 2022 hian zirlai 29 thlanchhuah te tan Rs 3,94,000 sem a ni. SRDC Fund atanga zirlai tanpuina hi SRDC hnuaia Hostel & Education Committee-in a thlante an ni a. Kum 2020 khan zirlai 15 te tan Rs 2,00,000 sem a ni a. Kumin 2022 hian zirlai 9 te tan Rs 1,16,000 an sem chhuak a ni.