Mizoram school zingah Primary School-ah zirlai tam berin Middle School ah zirtirtu an tam ber thung.   Tunhnai Economics & Statistics Department-in ‘Mizoram at a glance 2018 (Mizoram state statistical profile)’ an tihchhuah tarlan danin kum 2016-2017 khan Primary, Middle, High School, Higher leh College zingah Primary school zirlai an tam ber a. Primary school-ah hian zirlai 149612 awmin an zinga 77483 hi mipa an ni a, hmeichhia 72129 an awm bawk. Primary dawtah hian Middle (Upper primary) chu zirlai ngah ber niin 88655 an nei a, High school 36529, Higher secondary 22540 leh College 16026 ten an dawt leh a ni.   Zirtirtu bikah Middle school-in zirtirtu ngah berin 10206 an nei a, Primary school 8510, High school 4513, Higher 1661 leh College 1057 ten an dawt leh a ni. School pakhata zirtirtu awm zat chawhrualah Higher secondary school chu sang berin school pakhat zelah zirtirtu 10 awm anga chhut a ni a, Middle leh High school-ah 7 leh Primary-ah 4 zel awm anga chhut a ni. Zirtirtu pakhatin naupang a enkawl zat ‘teachers pupil ratio’ ang chuan Primary zirtirtu pakhatin naupang 18 zel a enkawl anga chhut a ni a, Middle ah naupang 9 zel leh High school-ah naupang 8 zel enkawl anga chhut a ni. School naupang kal chhunzawm lo/chawlhsan ‘drop out rate’-ah Primary an sang ber a, Middle leh High school ten an dawt leh a ni.   Chhinchhiahna atanga a lan danin Mizoram pumah Primary school 1968, Middle school 1542, High school 640, Higher secondary school 173, College 26 a awm mek.   Hetih lai hian naupang lehzual enkawltu Social Welfare department chuan Mizoram pumah anganwadi centre 2244 an nei mek a, henga naupang inziaklut zat hi 120712 niin Mizoram khaw awm zawng zawng zinga 97%-ah anganwadi centre hi an nei mek. Social Welfare department hian tar pension pek mek mi 25469 an nei nia chhinchhiah a ni bawk.