ZALEN Oct 10, 2024; Director, School Education Department-in hriattirna a chhuah a tarlan a nih danin, School Education Department hnuaia zirna in zawng zawngah tui in hun siam a ni dawn.

Director in circular a tih chhuah a tarlan a nih danin, Hon'ble minister, School Education Department hova School Education Department officer te meeting chuan school naupangte hriselna atan 'tui in' hi chin than (habit)-a an neih theihna turin hmalak tha a ti a, chuvangin, School Education Department hnuaia zirna in zawng zawng ten tui in hun siam tur a ni a, hemi hunah hian tui in dar (water bell) vuain, naupang zawng zawngte tui in tir thin tur a ni.

Tui mamawh zat chungchangah mithiamte rawn an ni a, Elementary School (PS&MS) naupangte chuan nitin tui litre 1.5 vel an mamawha ngaih a ni a, High School leh Higher Secondary School naupangte chuan nitin tui litre 2.5 vel an mamawh a ngaih a ni bawk.

Nitin school naupangin an tui mamawh chanve tal school-ah an in theihna turin 'Tui in dar' (water bell) vawi 2 aia tlem lo vuak thin tur a ni a, a hunbi chu school tinin mahni a lo inruahman tur a ni ang.