ZALEN, June 25, 2025: Mizo film chhuak tawh zinga hit ber ber - ‘Dengi I love you’ leh ‘Mo Kawr’ tih siam tawhtute pawhin an film siam tawha an chhuan ber pawl ni hiala an sawi, ‘Khawnge?’ tih chu Zirtawpni zan hian tlangzarh a ni dawn ta!

Movie hit tak dang, ‘Nukawki Pasal’ leh ‘Thih Leh Dam 1 & 2’ pawh lo hlawhtlingpui tawh, Conflate Video film thar ber hi Saikuti Hall, Lunglei-ah release a ni dawn a, Lersia Play-ah lei theiha chhawp chhuah nghal a ni ang.

A buaipuitu, Bva leh Ngaihawma Fanai te chuan, “Kan film buaipui tawh zinga kan la chhuan ber pawl a ni a, miin hmuhnawm an tih ngei kan beisei,” tiin ‘Khawnge?’ chungchang hi an sawi.

Bva leh Ngaihawma hi hi Mizo Film Award hnuhnung berah khan Best Film, Best Director leh Best Screenwritter latute niin ‘LERSIA PLAY CHOICE’ tih hlawh pha ngat a ni.

‘Khawnge?’-ah hian Mizo hmeichhe star langsar ber, Rosangpuii Ralte bakah sulhnu eng emaw zat lo nei tawh - Sangtea Chhangte, Sena Ngente, David Zawma, Deborah Ralte te pawh an inlan dawn.

Mizo film tam tak zinga a thawnthu kal dan danglam bik leh a entute tang taka siama a changa nuihna awm kara mittui titla thei tur pawh inzep telna a ni dawn a ni.