ZALEN December 2, 2024 : MNF chuan Mizoram Sawrkara Samagra Shiksha hnuaia thawk mek, zirtirtu leh thawktu dang tam tak, mi 3487-in Thla thum dawn hlawh la thei lova, an hlawh tur Central atanga thleng vek tawh hrenbeh sak an ni hi a pawi an ti a, a rang thei ang bera pechhuak thuai turin Mizoram Sawrkar an phut.

MNF chuan, "Hun kal tawha kaldan thlirin, Samagra Siksha hnuaia thawktute tana sum lokal hi May 2024 vela 2nd Installment lo thleng tawh tura beisei a nih laiin, November 8, 2024-ah Central atangin a lo thleng chauh a, a lo thlen tlai tawh teh lul nen, ziaka ni 15 bak Mizoram Sawrkar chu kawl tang lo tura tih a nih laiin, November 23, 2024-a ni 15 a ral hnu vawiin thlengin pek chhuah a la ni lo cheu a. Hei hian sum enkawl kawngah leh zirna ngaihpawimawh kawnga ZPM kaihhruai sawrkar hlawhchham zia chiang takin a tarlang a ni," an ti.

"Hetiang taka zirna ngaihthah leh thawktute hlamchhiah Sawrkar kan nei hi vanduaithlak kan tiin, an tha leh thiamna chhawr duh reng chunga an hlawh hren sak rengtu, Mizoram Sawrkar hnuaia sum enkawltu Finance Minister hian a hna a tlin thlawt lo ni ah kan ngai a. Heng thawktute enkawltu School Education Minister pawh hian a enkawl Department thawktute pawimawhna hi a hre tawk lo nge, a ngaihna a hre thlawtlo tih hi mipuite zawhna a ni," an ti.

MNF chuan, "Opposition an nih laia inti hria leh sawrkar lai na tak taka sel thintu, vawiina a ti thei dinhmuna dingtate hian an mawhphurhna hi a rang thei ang bera hlen thuai turin kan phut a. An thawh hlawh liau liau a hun taka pe thin tur leh hunpui lo thleng tur hi an hlawh hmanga an chawm, an chhungkuate nen thlamuanga an hman ngei theih nan Mizoram Sawrkar chu a tih tur ti nghal turin kan phut tlat a ni," an ti bawk.