March 12, 2024; School education minister Dr. Vanlalthlana'n pawl 10 exam zawhna a thil felhlel deuh awm chungchang-ah MBSE in FIR an thehlut tih a sawi a, chumi ang chuan zirtirtu suspend tak chu jail a kal a ngaih phah tih a sawi.

Vawiin assembly budget session zawhna leh chhanna hun-ah member te zawhna leh zawhbelhna te chhangin school education minister chuan, pawl 10 exam zawhna chungchang a felhlel deuh awm chungchangah meeting an nei zing hle tih a sawi a, department in mawhphurhna a lak thu te, sawrkar hnathawkin a tih loh tur a tih avangin he thil avang hian hma an lak thu leh chhuichian a ngaih dawn avangin, lo chawl rih rawh se tia hma an lak thu a sawi.

"Departmentin hma a lak chuan MBSE lam pawhin dan angin hma an la a, FIR a thehlut a, thil pawi tak chu sessions judge a lo awm remchan loh avangin suspend tak hi jail ah a kal a ngaih phah a, a pawi kan ti khawp mai," tiin, chiang zawkin thil awmdan a la hriat theih zel beisei a nih thu a sawi.

Hun lokal leh tur ah a him zawk nan question setna hmun ah CCTV dah a ni tawh dawn tih sawi bawkin, "Zirtirtute an sual dawn e, kan veng run dawn e tihna lam nilo in, mihring kan ni a, tihfuh loh palh te awm thei a ni," ti bawkin, hetiangah hian inzir zel kan ni a, in siamrem zel ngai a nih vang a nih thu a sawi.