August 28, 2023; National Award to Teachers 2023 dawng turin Lalthianghlima, Teacher, Govt. Diakkawn High School, Kolasib chu Ministry of Education, Government of India chuan a thlang.

National Award to Teachers hian chawimawina thuziak leh pawisa fai cheng 50,000/- bakah Silver Medal a keng tel a. Lalthianghlima hi India ram hmun hrang hranga NAT 2023 dawng thei tur zirtirtu tha thlan chhuah mi 50 zingah a tel a ni. Mizoram sawrkar chuan he chawimawina dawngtute service hi kum khat a pawhseisak thin bawk.

Zirtirtu tha thlan chhuahte hnena chawimawina sang National Award dawng tur hian zirtirtu te hian tehfung leh kalphung fel tak chi hrang hrang an paltlang a ngai a; Village Level Committee atanga bul tanin District Level, State Level leh Independent National Jury ten uluk taka an endikna an paltlang vek a ngai thin.

National Awards to Teachers 2023 hlanna inkhawm (Award Ceremony) hi September ni 5, 2023, Zirtirtute Ni-ah Vigyan Bhawan, New Delhi-ah neih a ni ang a, India President  Droupadi Murmu chuan National Award hi a hlan ang.

National Award to Teachers 2023 dawng tur Lalthianghlima hi a lawmpui takzet tih chief minister Zoramthanga'n a official IG page ah a tarlang.